WILLEMSTAD.- Eugene Rhuggenaath lider polítiko di PAR a tuma nota resientemente den medionan di komunikashon ku Minister Presidente sr. Pisas a deklará gobièrnu di Kòrsou bankarota.  Esaki ta otro muestra di un gobièrnu anti-pueblo, ku den e kaso aki a hasi deklarashonnan iresponsabel, nò basá riba bèrdat, ku konsekuensia negativo pa nos ekonomia.  P’esei PAR ta pidi pa Minister Pisas aklará e situashon aki i rektifiká su deklarashonnan mas lihé posibel.

Bisando ku Kòrsou ta bankarota ta nifiká nos gobièrnu no ta kapas pa kumpli ku su debenan. Esta ku e debenan koriente ta surpasá e bienes (‘assets’) di gobièrnu, inkluso fondonan líkido (kèsh) i entradanan di gobièrnu (p.e. impuesto, rekargonan, dividendo).  Ku esaki Sr. Pisas a pone nos pais su finansa públiko den un lus sumamente negativo, ku konsekuensia ku komunidat, inkluso empresa i invershonistanan, lo pèrdè konfiansa total den gobièrnu su abilidat pa kumplí ku su debernan di pago.  Esaki, mirando e riesgonan (‘country risk’) sigur lo kousa un paro di invershonnan importante i generashon di kuponan di trabou ku ta tan nesesario na e momentunan aki.

Rhuggenaath ta sigui bisa ku mas tristu ta ku e kuadro ku Minister Pisas a pinta, tampoko no ta kuadra ku bèrdat. E último rapòrt di CFT, 15 mart 2017, ta indiká ku nos finansa públiko ta stabil i ku por hasta spera un surplus di 5.6 mion florin pa fin di 2016.  Ademas CFT a indiká ku e peso di interes ta denter di normanan stipulá (‘rentelastnorm’) i ku e kuota di debe ta 42% di nos produkto doméstiko bruto (GDP).  Lokual sigur ta un posishon sano, si nos kompará esaki ku Ulanda ku tin un défisit chikí riba su presupuesto di (0.5%) i un kuota di debe di 70% di su GDP.  Standard and Poor (S&P) tambe den su relato di 22 mart 2017 a re-afirmá e ‘credit rating’ faborabel di A-/A-2 pa gobièrnu di Kòrsou, basá riba un perspektiva stabil pa e siguiente 2 pa 3 aña, un balansa finansiero fuerte (‘external balance sheet’) i posishon di bienes nèto sano (‘net asset position’).  Esaki ta echonan konfirmá resientemente pa organisashonnan tersera, independiente, esta pafó di gobièrnu.  Pues PAR ta urgi pa Minister Pisas spliká basá riba kua dato e a yega na konklushon ku Kòrsou ta bankarota i si esaki no ta kuadra pa rektifiká esaki inmediatamente!

Si ta intenshonalmente Promé Minister  Pisas a krea un impreshon robes òf fiktisio di nos pais su situashon finansiero, kiko ta e motibu?  Kisas ta pasobra ya, Sr. Pisas a realisá ku e gobièrnu populista aki no ta kapas pa kumpli ku promesanan hasí na nos pueblo i ku pa motibu ei ke kulpa e sitashon finansiero?  Of t’asina e di dos medida di alto-supervision di Reino igual ku esun di sèptèmber 2012, debí na nan maneho finansiero deskabeyá, ya na ta kaminda?  Kisas Minister Pisas ke kore pone e kulpa di nan inkapasidat pa ehekutá tur loke a primintí i pa un mas ‘aanwijzing’ riba gobièrnunan anterior?

Kual sea ku ta e motibu pa e deklarashon bergonsoso di Sr. Pisas, lokual si ta keda un preokupashon real ta e konsekuensia di intenshon i desishonnan anti-demokràtiko di e gobièrnu aki pa nos stabilidat finansiero i e rating  faborabel di S&P.  E rating A-, ku ta konta pa gobièrnu pero tambe Aqualectra, ta sumamente atraktivo pa invershonista i tambe ta hasi finansiá proyektonan grandi, importante pa nos ekonomia na interes abou (p.e. hospital nobo, modèrnisashon di planta di utilidat, proyektonan di bibienda i infrastruktura). S&P ta splika den su relato ku un motibu prinsipal pa e rating ta: Kòrsou su sistema polítiko stabil, demokrátiko den konstelashon di Reino Ulandes.  E gobièrnu aki, di Grupo 12, ya a trata di stroba nos proseso demokrátiko, dor di trata di para elekshon di 28 di aprel, i siman pasá a hasta deklará di ke sali for di Reino pa Kòrsou bira independiente. E intenshon anti-demokrátiko aki  lo ta funesto pa nos rating di S&P, nos finansa públiko i sigur nos desaroyo sosial-ekonómiko.  Promé “Minister Pisas, mirando ku bo ta responsabel pa sirbi interes di nos pais, mihó bo kita for di e rumbo di independensia aki.  Kòrsou no a pidi i lo no ta sirbí pa esaki”, asina e lider polítiko di PAR sr. Rhuggenaath a terminá bisando.