WILLEMSTAD.- Gobièrnu di Kòrsou ta kontentu ku e atenshon ku Parlamento Ulandes ta dunando na  e situashon ku Venezuela. Esaki ta e promé reakshon di Minister presidènt Eugene Rhuggenaath a base di un moshon di Tweede Kamer den kua a duna enkargo na minister di defensa Ank Bijleveld pa prepará aliadonan pa brinda protekshon barba na islanan Kòrsou, Aruba i Boneiru kontra Venezuela.

Sr. Rhuggenaath den deklarashon na EXTRA a mustra ku gobièrnu tin konsulta kontinuamente ku ministerionan ulandes manera esun di asuntunan eksterior i tambe otronan. Tambe tin kombersashon ku minister di defensa Ank Bijleveld. Anteriormente gobièrnu di Kòrsou formalmente a pidi asistensia na gobièrnu ulandes pa posibel senario di migrashon masal, kaminda ku e posishon ta ku Kòrsou mester por konta riba asistensia di paisnan den reino konforme Statüt artíkulo 36.

Pa loke ta trata e parti militar minister presidènt a bisa ku aktualmente nos no tin motibunan pa pidi asistensia i protekshon robusto. Klaro ku nos mester ta alerta si i den kombersashon ku e tabatin ku minister di defensa Ank Bijleveld sigur a pidi vigilansia di nos kostanan kaminda tin tantu defensa komo nos wardakosta loke ta algu positivo. Wardakosta tambe ta kai bou di kartera di Bijleveld.

Otro nota positivo ta ku gobièrnu di Kòrsou a mira ku gobièrnu ulandes, despues di hopi tempu a amplia e presupuesto pa defensa. Esei ta pone ku gobièrnu di Kòrsou ta spera di por mira mas rekurso òf mas ekipo moderno pa loke ta trata wardakosta den Karibe. Un defensa mas barbá sr. Rhuggenaath ta mira e motibu, pero e atenshon ta bon bini. E no tin duda ku minister Bijleveld lo duna atenshon na esaki.

E preokupashon tei

Otro punto ku e moshon ta indiká ta e koperashon entre aliadonan pa loke ta trata defensa den Karibe general. Esei ta algu ku gobièrnu di reino mester studia. Den pasado e kolaborashon ku aliado ta importante. Forsa arma, nan tarea primario ta esun di defensa i protekshon militar, pero tin tambe otro tareanan. Huntu ku wardakosta ta wak krímen ku ta krusa frontera, pero tambe ta duna asistensia manera den kaso na Sint Maarten i otro islanan despues di orkannan Irma i Maria. Tabatin kolaborashon ku Fransia i Gran Bretaña i Kòrsou a hunga un ròl logístiko den esei. Di tur manera e koperashon ku aliadonan ta algu ku minister di defensa mester bai evaluá.

Sr. Rhuggenaath ta suprayá ku e preokupashon tei pa e situashon ku ta surgiendo na Venezuela i lo sigui vigilá komo gobièrnu di Kòrsou, miéntras ta ta sigui invertí den e relashon diplomátiko ku Venezuela meskos ku na nivel di reino.