WILLEMSTAD.- Gobièrnu di Kòrsou awe mainta a tene un Relato di Dia ekstraordinario pa informá riba “Situashon di wer na Kòrsou i medidanan di prekoushon”.
Minister-presidente Gilmar ‘Pik’ Pisas a splika ku: ‘Wer ta hopi difísil pa pronostiká. Tin kambio drástiko ku no ta den nos man. Nos ta aki pa suministrá i alerta. Si kambio bin, nos tin ku aseptá. Naturalesa a disidí otro. Nos a hasi un kalkulá ayera, pero situashon a kambia. For 11or ia nos ta spera hopi awa seru. Ku ta nifiká ku pa motibu di último desaroyonan toke ta keda ta drenta na vigor 11 or. Tur establesimentu pa eksepshon di funshonnan vital mester sera pa 10 or di mainta. Transporte públiko ta kore te 11 or di mainta.’'
Pisas a bisa ku: ‘Tempunan difísil ta krea hende fuerte.’ El a menshoná pandemia di Covid-19 i Guera na Rusia. ‘Awor nos ta den otro krísis. Un posibel tormenta tropikal. Nos tin ku pone nos fe i perseveransia dilanti. E lo afektá hopi di nos. Nos por garantisá nos mes ku nos lo bin bek for di esaki. Sierto kambionan, mi sa ku ta difísil. Hende por rabia, mi ta aseptá esaki. No kai den pániko. Nos mester ta mas mihó prepará.'