WILLEMSTAD.- Minister-presidente Eugene Rhuggenaath ta víktima di robo di identidat. Investigashon dor di korant EXTRA ta revelá ku for di algun tempu hende deskonosí ta aserkando yu’i di Kòrsou riba Facebook ku e nòmber i portrèt di Rhuggenaath. Nan ta aserká hende pa splika ku nan por partisipá na un programa ku Kòrsou tin ku Union Oropeo. Den e kuadro ei nan por haña un fiansa di 50.000, 60.000 òf 70.000 Naf florin pa kuminsá un negoshi. E estafadó ta  hasi uso di un “account” ku nòmber i portrèt di Rhuggenaath. “Rhuggenaath” tin kontakto via Facebook ku e hendenan. “Rhuggenaath” ta bisa hende pa tuma kontakto ku sra. Liliane Coutier, ku supuestamente ta traha pa Union Oropeo na Fransia. Si un hende ke haña un fiansa nan tin ku paga un montante di mas ku 400 Naf komo “seguro” i manda riba kuenta di banko na Fransia di Liliane Coutier. Tambe nan tin ku manda un kopia di nan sédula òf pasport, number di kuenta bankario i otro informashon personal. For di fuentenan verídiko EXTRA a tuma nota ku diferente hende na Kòrsou a manda sèn riba e kuenta di un banko na Fransia, sin haña niun fiansa riba nan kuenta.

Esaki ta mustra ku basta hende na Kòrsou no ta tuma tempu pa wak loke ta ser tres’é dilanti ku koutela manera mester ta, pero ta reakshoná hopi lihé riba un oferta ku ta zona hopi bon, sin mas investigashon.

Minister-presidente Eugene Rhuggenaath ta na altura di e situashon. El a splika EXTRA ku el a tuma kontakto ku Facebook pa stòp e situashon ku hende ta hasi uso di su nòmber i portrèt riba Facebook.

Rhuggenaath: ‘Mi tin ku bisa ku mi ta víktima di robo di identidat. Esaki ta mustra ku “cybercrime” ta un tópiko ku no ta hopi leu for di nos. Esaki ta algu ku ta afektá tur hende na Kòrsou.’ Rhuggenaath ta lamentá profundamente ku tin hende na Kòrsou ku a kere ku tabata su persona ku a aserká nan. ‘Nan a duna sèn den konfiansa, pero nan a keda perhudiká.’ Rhuggenaath a tuma kontakto ku Facebook riba esaki. Segun minister-presidente Facebook lo tuma akshon kontra di esaki.