WILLEMSTAD.-Minister di finansa Javier Silvania den un di su publikashonnan riba ret sosial ta informa ku el a pone 2 mion florin disponibel pa e kompania di konvoi ABCbusbedrijf pa asina e kompania por kumpra 5 konvoi pa sirbi transporte publiko di Kòrsou mihó.

E minister ta splika ku el a duna oido na preokupashon ekspresa pa su kolega enkargá ku Transporte sr. Charles Cooper i tambe na parlamentario Osepa (PNP).

Manera EXTRA a informa anteriormente e situashon di e kompania ABC ta bastante delikado. Resientemente e direktor John Cijntje a pidi gobièrnu pa eksonerá e debe di belasting ku e kompania a akumulá durante di último añanan. Minister Charles Cooper a koregí splikando ku ta Parlamento ta e úniko ku lo por duna eksonerashon di debe di impuesto. Di otro banda ta un echo ku e flota di e kompania ta unu hopi bieu. Den e kuadro ei a pensa pa invertí na kompra di 15 konvoi nobo. Sinembargo e petishon di e kompania a drenta demasiado lat pa e aña aki. Parlamentario Osepa tambe a pidi minister Cooper pa buska sikiera ta 5 konvoi nobo pa aliviá e situashon.

Ku e 2 mion florin ku minister di finansa ta pone na disposishon e kompania ABC Busbedrijf por kuminsá hasi e trámitenan pa kumpra algun konvoi nobo.