WILLEMSTAD.- Despues di perhudiká e pagadó di impuesto ku si a kumpli ku lei i kontribuí asina den kaha di gobièrnu, ta toka turno pa minister di Finansa, Javier Silvania perhudiká esnan ku a kere ku nan ta eksonerá for di nan debe di impuesto. Na e konklushon aki lider polítiko di MAN-PIN, Giselle Mc William ta yega despues di a tuma nota ku hopi asombro di deklarashon di Silvania siman pasa, esta ku e no a eksonerá ningun hende den e debakel ku a kosta kaha di gobièrnu 3 miar florin na impuesto ku tabata riba kaya.

Mc William ta bisa ku despues di e deklarashon di Silvania den reunion di Komishon Sentral di Parlamento diferente persona i komersiante a aserká su persona. “Tin siudadano i empresario chikí ku ta den un angustia i inseguridat pasobra nan por komprondé ku Ontvanger por bati un ora pa otro na nan porta pa kobra nan debe di impuesto ku nan a kere ku minister Silvania a laga kanselá.”

E situashon aki pa Mc William ta inaseptabel den kuadro di konfiansa ku e siudadano nan mester tin den desishonnan i maneho di mandatarionan. “Empresarionan ta man na kabes ya ku nan no tin e sèn aki mas pasó nan a invertí’ esaki òf a hasi algu otro kuné.”

Ta a base di e situashon aki Mc William ta konkluí pues ku minister Silvania pa motibu di su maneho deskabeyá ta perhudiká empresarionan i siudadanonan ku a asumí a base di palabra di e minister ku a kanselá nan debe. “E minister indudablemente ke konfundí tur hende pa asina tapa posibel echonan kastigabel kometé.”

Echo ta, esta Mc William ku e minister a tuma un desishon ku a stroba Ontvanger di kobra 3 miar florin na debe di impuesto. Silvania entre otro a kanselá tur empresario ku tabatin riba 1 mion florin atrasá na pago di impuesto, debenan di impuesto a base di aktonan froudulento i sumanan riba kuenta bankario di notarionan /abogado “derdenrekening” di debedónan di impuesto.

“Nos tur kòrda kon Silvania na yanüari 2023 a bisa riba su página di Facebook ku tur hende por bai buska nan “debiteurenkaart” na Ontvanger pa nan ta sigur ku a kanselá nan. Banda di a eksonerá/kanselá hopi mion florin di esnan ku tabata debe riba 1 mion florin na impuesto, e minister su desishon a kanselá tambe debí na impuesto di esnan ku a kometé froude.”

Mientrastantu MAN-PIN ta warda riba e reunion públiko ku a pidi ku karakter di urgensia segun artíkulo 96 di reglamento di órden di Parlamento pa por haña un aklarashon a base di dokumentonan relashoná  ku deklarashon di Silvania ku e no a eksonerá debe. MAN-PIN ta kòrda presidente di parlamento, Charetti America-Francisca pa kumpli ku su tarea i yama e reunion aki, miéntras ku ta kòrda Minister Silvania pa bini ku hefe di Ontvanger, Alfonso Trona pa di e manera aki haña aklarashon riba base hurídiko di e desishonnan di Ontvanger na nòmber di Minister Silvania ku a kosta pueblo aki 3 miar florin, Mc William ta terminá bisando.

Foto:

...Giselle Mc William...