WILLEMSTAD.- Relashoná ku e datonan di kobradónan di ònderstant ku ta riba kaya, minister Javier Silvania ta bisa ku no tabata su intenshon pa publiká e datonan konfidensial aki.

Durante e tratamentu di presupuesto di Ministerio di Desaroyo Sosial, Labor i Bienestar (SOAW) ku a tuma lugá resientemente den Staten, a sali na kla ku dokumentonan ku ta kontené datonan personal konfidensial di kobradónan di ònderstant a wòrdu kompartí pa ekibukashon ku miembronan di Staten.

Esaki ta un fayo humano i lamentabel, ku a tuma lugá sin ningun mal intenshon minister Silvania ta splika.

“No tabata mi intenshon tampoko pa publiká datonan konfidensial. Ounke mi no tabata direktamente envolví den e repartishon di e datonan aki, esaki ta un fayo ku a sosodé bou di mi responsabilidat”.

Minister ta sigui bisa ku pa motibu di e preshon haltu di trabou, oranan lat i kansansio durante e dianan intensivo aki, lamentablemente a manda e fail no intenshonalmente pa Griffie, kende seguidamente a manda e dokumentonan pa tur miembro di Staten. Tantu minister komo e empleadonan envolví ta lamentá e insidente profundamente, i nan ta tuma esaki sumamente na serio. “Lo mi tuma e medidanan nesesario pa prevení ku esaki ta bolbe ripití”, minister ta sigui bisa.

E ta ofresé su diskulpa sinsero na tur esnan envolví i ta suprayá ku protekshon di datonan personal ta keda nan prioridat prinsipal. Pa evitá ripitishon, minister a instruí pa hasi un investigashon profundo riba e kousa di e insidente aki. Basá riba e resultadonan, lo implementá mekanismonan di kontrol mas estrikto i protokòlnan interno mehorá pa garantisá seguridat di datonan den futuro.

E minister ke un reakshon denter di 2 dia pa sa ta kiko a bai robes, dikon e kos aki por a sosodé.

Minister alabes ta hasi un yamada na tur partido envolví pa trata e informashon risibí ku hopi koutela i pa garantisá konfidensialidat. El a manda un karta ofisial na Staten ku e petishon na tur miembro di Staten pa trata ku e informashon aki di forma konfidensial.

Komo minister el a bisa di ta karga e responsabilidat final i ta tuma e responsabilidat aki sumamente na serio. E lo sigui supervisá e kumplimentu di e medidanan aki i sigurá ku insidentenan similar no ta bolbe sosodé den futuro.