WILLEMSTAD.- Ayera mainta na Lanthuis Dokterstuin a tuma lugá e Apertura di Siman di Kultura. Un apertura bon organisá kaminda Sektor di Kultura a presentá un evento ku por a sigui riba nan plataforma digital.

Pa esnan presente nan por a disfrutá di presentashon di gruponan di baile, músika di Kaha di Orgel ‘Cicilia’ di Winchi Martha, seremonia di Traspaso di Sabiduria i entrega di Proklamashon ‘Fecha nashonal pa rekorda Serapio Pinedo’.

Minister di Kultura, Sr. Sithree van Heydoorn ayera mainta durante di su diskurso a pone atenshon na diferente punto ku a hala atenshon. E punto prinsipal tabata e “Bienestar den Konteksto Kultural” – Konop’e, Halse i Trapas’e!.

“ Por lo general kultura ta un totalidat di kustumbernan den un sosiedat, manera entre otro nos kumindanan, nos trahenan folklóriko, nos músika pero tambe nos forma kon nos ta komuniká ku otro. Tur esakinan ta visualisá ku nos ta un Kòrsou patriótiko i determiná pa nos sali dilanti.

Kultura ta empoderá e ser humano ku e kapasidat pa reflekshoná riba su mes komo parti di un sosiedat i pa kada momentu e sinti su mes orguyoso di loke nos ante pasado nan a krea pa nos na Kultura, den e sentido mas amplio di palabra.

Ta nos tarea awor pa defendé i protehá nos kultura. No ta momentu pa nos ban eksperimentá i trata na trese i òf kombiná nos Kultura ku Kultura di otro pais.

‘Nos ko ta Nos ko’

Nos ta un pais, kaminda tin un kantidat grandi di diferente persona di diferente nashonalidat ta biba pero, ‘Nos ko ta Nos ko’ i nos no mester permití pa mishi ku nos Kultura o trata na influensia esaki di ningun manera.

Laga kada un di nos yuda di un forma kreativo pa mantené i halsa nos Kultura. Tempu nos grandinan a pone e fundeshi i krea e Kultura ku awe nos ta para aki nan p’e, nan no tabata dispone di miónes di florin.

Ta p’esei awe ku pais ta pasando den un krísis finansiero ekonómiko profundo, ban ta kreativo i ban stòp di pone dilanti e aspekto finansiero na promé lugá ora ta trata Kultura.

E siman di Kultura aki mi koleganan na Ministerio a opta mirando e situashon di salubridat i e pandemia ku nos ta pasando aden pa pone aksènto riba importansia pa nos hiba un bida salu. Ta p’esei e siman di kultura aki ta titulá; “Bienestar den Konteksto Kultural” – Konop’é, Halse i Trapas’e!.

Esaki ta motibu ku mi koleganan a traha riba un foyeto ku informashon sumamente balioso relashona ku temanan di Kultura pero tambe riba temanan di Bienestar Sosial i Salu.

Nos ta konvensí ku for di un punto di bista di un enfoke mas amplio riba Bienestar Sosial i Salu i ku e poko rekurso nan finansiero ku nos ta dispone di dje nos ta mira mas leu ku solamente indikadónan finansiero i ekonómiko pa nos por rekuperá komo pais i sigui traha riba nos Bienestar, Salu i Kultura.

Ami komo titular di e Ministerio di Enseñansa, Siensia, Kultura i Deporte ta para pa un konsepto Kultural kaminda e ser humano mester protehá i elevá loke nos antepasadonan huntu ku baluartenan ku ya awe no tei mas a krea. Manera entre otro nos balornan, nos kreensianan, material i ophetonan di importansia i kustumbernan di un Kòrsou determiná. I lo mi no kansa di pusha i bisa Ban Selebrá Kultura ménos i Eduká Kultura Mas”, palabranan di Minister di Kultura, Sr. Sithree van Heydoorn.