WILLEMSTAD.- Tantu Inspekshon di Salubridat komo minister Suzy Camelia-Römer di Salubridat, Medio Ambiente i Naturalesa ta pro legalisashon di cannabis pa uso médiko na Kòrsou. Asina Ret Karibense ta skirbi.

E pregunta ta ta ken lo bai kultivá e cannabis na Kòrsou pa e produkshon di zeta THC. Kuradó di yerba Dinah Veeris ta un di e proménan ku ta interesá abiertamente den kultivashon di mariwana.

‘Nos mester warda te dia e bira legal, pa asina nos por pone e paso ei’, Veeris ta bisa. ‘Pero promé ku esei mester studia tambe. Bo mester sa kiko bo ta planta: Cannabis Sativa, òf Ruderalis. Tin mas sorto. Bo no por djis kuminsá planta anto bende, bo mester prepará bon.

THC, abreviashon di Tetrahydrocannabinol, ta un supstansia siko-aktivo: Bo por bira haltu di dje. ‘Un grupo di hende na Kòrsou ta adikto na dje. Tin mucha tambe ku ta adikto na mariwana. Nos mester kòrda esaki si i regulá bon e uso di cannabis pa metanan médiko’, Veeris ta bisa. ‘Ora bo bai kultiv’é i produsí e zeta, bo mester sa tambe kuantu THC ta bai aden. Mester tin bon kòntròl di esaki.’

Veeris ta boga pa koperashon ku gobièrnu i un kampaña di informashon pa públiko. ‘Cannabis medisinal mundialmente ta un tópiko. Ta trata di un mata masha bieu, e tabata eksistí for di tres mil aña promé ku Kristu. Zeta THC por ta masha efektivo den trato di enfermedat grave, pero hende mester haña bon instrukshon kon nan mester us’é.’

Minister Suzy Camelia-Römer di Salubridat a bisa Ret Karibense di ta habrí pa legalisashon di cannabis. ‘Den koalishon mi a plantia si mester permití cannabis pa metanan medisinal òf nò. Si tin sufisiente sosten polítiko, lo desaroyá un prosedura kaminda lo deskribí e produkto i ku lo konektá kondishon na dje.’

E minister ta bisa ku e ta konvensé di e bentahanan di cannabis. ‘Meskos ku mi ta konvensé di e benefisio di kura tradishonal, di nos yerbanan. Tin sufisiente prueba sientífiko pa e efektividat di cannabis.’