WILLEMSTAD.-Awor si mester atendé situashon di e edifisio di Cinelandia. De un karta ku minister di VVRP, Zita Jesus-Leito a manda pa propietario di Cinelandia Fernando da Costa Gomez e minister ta mustra ku énfasis riba  e situashon di e edifisio den Punda ku ya kaba a bira un asuntu di peliger serio. A bolbe konstatá ku e edifisio ta den un estado tékniko hopi deteriorá.

Tin diferente rapòrt di ekspertonan di 2008 i 2019 ku ta mustra riba e situashon serio di e edifisio. Awor aki na 2021 e deterioro ta mas tantu. E edifisio ta presentá riesgo di basha den otro na kualke momentu mirando ku restourashon di e edifisio téknikamente no ta posibel mas. E edifisio den su estado aktual ta un peliger pa tur hende ku ta move den e besindario ei i den kaso ku e edifisio òf parti di edifisio basha abou i hasi daño na hende e víktimanan lo por demanda e doño i Gobièrnu.

Minister Jesus-Leito den e kuadro aki ta ordená doño di e edifisio pa dentro di un tempu di máksimo un luna e basha e edifisio abou. Pa hasi esaki e doño mester buska un kontratista ku tin konosementu di es trabounan aki i e kontratista mester entrega na ministerio di VVRP un petishon ofisial pa mas tardá un siman despues di e karta aki. Mas detaye den edishon di EXTRA.