Miéntras tantu ta yena burakunan ku betòn

WILLEMSTAD.- Sin duda lokual e tópiko di último dianan, ta e situashon di kayanan aki na Kòrsou. Na vários okashon EXTRA a relatá i mustra vários kaminda kual ta nan estado ta laga hopi di deseá. Kamindanan tur na buraku lokual ta pone ku no tin kaya mes mas. Ta den buraku outomobilistanan ta keda kai.

Un di e kayanan ku EXTRA a mustra ta Kaya Kazerne bai te na Rio Canarioweg/Punta Cardonweg. Despues ku siman pasá EXTRA a mustra tokante situashon di e kaya aki, ayera nos a tuma nota kon tabatin hende yenando buraku riba e kaminda ku betòn.

EXTRA a tuma kontakto ku Minister di Tráfiko, Transporte i Planifikashon Urbano Zita Jesus-Leito pa asina wak si e òrdu pa yena buraku a bini di Gobièrnu i kon bin ta yenando kaminda ku betòn i no asfalt. Jesus-Leito a indiká na EXTRA ku en bèrdat a duna òrdu pa kuminsá yena buraku ku betòn pa tan ten.

Awor aki e plan di emergensia a keda kla i un ora pa otro sèn mester drenta pa asina mes ora por kuminsá drecha e diferente kayanan ku ta den mal estado, Jesus-Leito a konfirmá pa EXTRA. Miéntras tantu ku ta wardando e sèn, a buska un solushon temporal.

Minister a konfirmá pa EXTRA tambe ku un di e kamindanan promé riba e lista pa keda drecha ta e kaya ariba menshoná huntu ku vários otro mas kual mester di atenshon urgente.