WILLEMSTAD - Ministerio Públiko (OM) Kòrsou a disidí pa persiguí Presidente di Banko Sentral di Kòrsou i Sint Maarten (CBCS) pa froude di belasting.

E investigashon kontra señor Emsley Tromp, yamá Saffier, a inisiá na 2016 relashoná ku informenan persistente den prensa tokante posibel malversashon finansiero kometé dor di e sospechoso. Den e kaso aki a tene vários entrada hudisial, entre otro na Banko Sentral i na kas di e sospechoso. Tambe a skucha algun testigu miéntras ku a risibí tambe dokumentashon for di eksterior. Naturalmente tambe a skucha e sospechoso mes tambe.

E investigashon a kondusí na entre otro e sospechoso ku señor Tromp no a pone belasting na altura di tur plaka ku el a risibí entre 2006 i 2014 den kuadro di su funshon komo entrada di su ‘pensioenopbouw’. Dor di esaki pais Kòrsou i Sint Maarten a pèrdè di gana posiblemente 5.5 mion na entrada.

E investigashon rondó di froude di belasting mientrastantu a terminá i tabata motibu pa Ministerio Públiko pa tuma un desishon. Ministerio Públiko ta spera ku denter di poko dia ta bai emití e sospechoso un dagfar pa e echonan aki. E dia ei tambe lo bira konosí ki dia e kaso den Korte ta keda tratá. Ministerio Públiko mientrastantu a pone e sospechoso na altura di e desishon.

E investigashon pa loke ta trata e otro sospechonan ta kontinuá. Mas despues ta tuma un desishon pa loke ta trata persiguishon di esaki.