WILLEMSTAD. - Dia 28 aprel 2017 tin elekshon ta tuma lugá pa Parlamento di Kòrsou. Ta den interes di Kòrsou i su habitantenan pa esaki tuma lugá di un forma mas demokrátikamente haltu posibel. Elekshon tin ku tuma lugá di un forma honesto.
Soborno di derechi di voto ta kastigabel konforme artíkulo 2:44 di Kódigo Penal di Kòrsou. Resientemente a subi e kastigu na dos aña di prisòn. Tambe ta posibel pa kita sierto derechi di un persona ku a keda sentensiá pa soborno. Esaki por nifiká ku un persona sentensiá pa soborno no por vota òf no por pone su mes elegibel mas pa elekshon. Un intento di soborno tambe ta kastigabel. Di esei ta papia ora ofresé un regalo òf primintí algu, pero ku e otro partido no ke koperá.
Un resultado puru ta esensial i di interes den un komunidat demokrátiko. Por yega na e resultado aki solamente si un i tur ta liber pa vota riba e partido di su eskoho i por tene e eskoho aki pa su mes. Manera hende ta laga kumpra nan mes en kambio di nan voto riba un partido polítiko, no por papia mas di elekshon liber.
Igual na elekshon di 5 di òktober 2016, ta bolbe bai vigilá riba tur señal di soborno. Pero tambe alerta riba señal di intimidashon i menasa. Ministerio Públiko ta determiná pa, yegando na e fecha di 28 di aprel 2017, pa vigilá i investigá e kasonan aki. Ministerio Públiko ke garantisá un proseso sin opstákulo pa elekshon benidero. Ku ta nesesario ta envolví Landsrecherche den esaki pa hasi un investigashon.
Posibel iregularidat i insidente ku a keda señalá  dia 18 i 19 di mart 2017 durante e aktividat di sostené lista ta aktualmente bou di investigashon. Huntu ku Konseho Supremo Elektoral ta studiando esaki pa asina un i tur por konkluí for di esaki.
Ta urgi esun ku tin señal di soborno, intimidashon òf menasa, òf a keda aserka ku esaki, pa hasi denunsia di esaki òf mèldu esaki via telefòn 917 òf anónimo via 108 pa di e forma aki por investigá esaki.