WILLEMSTAD.- Korte di apelashon ayera a trata e kaso di 800 kilo ku a keda deskubrí riba e boto  venezolano Gabiota Dorada dia 31 di yüli aña 2019 pro forma.   Ministerio Públiko a apelá e sentensia despues ku 9 di e 10 akusadonan a keda apsolvé di tur kulpa. E kapitan so a haña kastigu di 8 aña i e tambe a apelá su sentensia.

Tabata trata di un grupo di 10 latino ku tabata konsistí di 9 venezolano i un dominikano ku a trata na drenta nos isla ilegal. Durante tratamentu di e kaso den korte di promé instansia, tur e latinonan a keda ketu i no kier a duna niun deklarashon. Hues  a duna nan chèns pa papia na vários okashon pero niun kier a bisa nada.

Hues a bisa ku tin vários deklarashon kontradiktorio durante interogashon na polis. Tur a ninga di sa algu di e droga na polis i a bisa ku nan a bin Kòrsou pa bin traha i kria nan famia. Na polis kasi tur a menshoná  vários orario ku nan a sali for di Punto Fijo pero niun tabata kuadra ku otro.                                           E dia ei Gaviota Dorada tabatin un boto tipo Yola mará na dje, na momento ku Warda Kosta a intersept’é.

Durante su veredikto den promé instansia, hues a relatá ku den oranan di mainta di dia 31 di yüli, e tim di Warda Kosta a señalá Gaviota Dorada. Mesora nan a bai riba nan pa wak kiko tabata pasando. Miembronan di Warda Kosta a relatá di a mira kon e kapitan tabata purba pusha e Yola fo’i dje boto pe bai pero nan a grit’é pa laga e boto para.

E tim di Warda Kosta a subi Gaviota Dorada i tene un kontròl i detené tur e tripulantenan.

Na e momento ei, no a haña droga na bordo. Segun  e prosèsverbal mas aleu  ora ku tabata transportando Gaviota Dorada, esaki a kuminsá senk i e  boto a keda  di tou i hibá Parera.  Siguiente dia ku tabata 1e di ougùstùs 2019, a saka e Gaviota Dorada kasi bou di awa i a tene un kontròl riguroso riba e boto.

Aki outoridatnan a kanta bingo, na momento ku nan a deskubrí e kargamentu di 803 kilo den e kompartimentu di e kapitan bon skondí.

Mes ora a kontrolá e GPS di ámbos boto di kual e agentenan a mira ku niun di dos tabatin  e ruta di Punto Fijo registrá manera e akusadonan a deklará. Tur dos tabatin e ruta Venezuela, Colombia, Kòrsou.

Hues a bisa den e veredikto apesar ku e deklarashonnan di e akusadonan tabata kontradiktorio, no por proba ku nan tabata sa ku tabatin droga skondí.

Hues a bisa tambe ku apesar ku e tin hopi duda den e kaso, pero e no tin sufisiente prueba.

Pa loke ta trata e kapitan Juan Enrique Zavala Sanchez  si hues a haña kulpabel mirando ku e droga tabata skondí den e parti kaminda e tabata i a konden’é na 8 aña i apsolvé sobrá di tur kulpa. Abogado Martis ku tin Sanchez, ayera den korte di apelashon a hasi petishon di e un deseo di investigashon kaminda e ta pidi pa e video kaminda por mira motor di e boto den funshon i tambe investigashon di e prosès verbal di e motor.

Dia 8 di yüli binidero e kaso lo keda tratá.