Faneyte:

WILLEMSTAD.- Despues di studia e diferente dokumentunan tokante e situashon na Politur, por konkluí ku durante vários aña tabatin falta di bon kontròl, falta di supervishon i falta di transparensia den maneho di sèn públiko ku a hinka den Politur. Asina kolaboradó di frakshon di PAR, Luigi Faneyte ta trese dilanti.

E ta mustra ku e investigashon hasí ta papia di sospechanan serio di iregularidatnan finansiero, manera uso di fondo di Politur pa gastunan personal, pago ku karchinan di banko di e fundashon i falta di dokumentashon. Na su opinion instansianan kompetente, manera Ministerio Públiko mester sigui evaluá e akusashonnan aki inmediatamente.

Na mes momentu, Faneyte ta bisa, e ouditoria tambe ta mustra ku despues di mei 2025 a kuminsá un proseso di mehorashon. A introdusí mas kontròl, prosesonan nobo i un sistema mas kla pa manehá e finansa di Politur.

“Loke ta mas importante awor, no ta solamente mira loke a pasa, sino tambe garantisá ku algu asin’aki no por pasa atrobe. Pueblo di Kòrsou tin derecho di sa kon ta manehá su sèn. Ora fondo públiko ta den wega, mester tin transparensia, kontròl i responsabilidat”, Faneyte ta deklará.

E ta enfatisá ku mester kontinuá ku e investigashonnan, sin interferensia, pa tur persona responsabel duna kuenta i rason di nan akshonnan, i pa gobièrnu fortalesé e kontròl riba tur fundashonnan ku ta manehá sèn di pueblo. “Esaki no ta konta únikamente Politur, pero ta konta en general kon gobièrnu ta protehá fondo públiko i kon ta bai restablesé konfiansa di pueblo den gobièrnu.”

E sospechonan serio di aktonan froudulento na Politur ta pa un suma di mas òf ménos 675 mil florin. T’asina ku den e periodo di 2020-2025 Ofisina di Turismo (CTB) a laga hasi un investigashon interno den e Fundashon pa Maneho Material & Operashonal Politur Kòrsou riba posibel iregularidatnan den e entidat. Aparentemente e iregularidatnan tin di aber ku uso no hustifiká di tarhetanan di krédito/débito.

Politur su tarea primario ta pa garantisá seguridat di turistanan ku bishitá Kòrsou. A base di señalnan riba un posibel maneho finansiero iresponsabel, a laga hasi un ouditoria interno. Resultadonan di ouditoria aki tabata motibu pa inisiá  ku un investigashon mas profundo. Komo parti di e investigashon a hasi un análisis di dokumentonan pa por a identifiká transakshonnan froudulento sin aprobashon òf outorisashon di direktiva i hunta di komisario dje fundashon.

Segun e rapòrt investigativo, a konstatá ku iregularidatnan den e maneho finansiero manera: transakshonnan finansiero no outorisá, insufisiente transparensia i reportahe, uso privá i ilegal di medionan di e fundashon, i mal uso di sistemanan di kompensashon.