WILLEMSTAD.- Dos hende hòmber i un hende muhé a presentá dilanti wes den un kaso pro-forma di trafikashon di hende. Esaki a sosodé dia 7 di febrüari último. E investigashon penal a haña e nòmber “Samario” i ta trata di sospecho di eksplotashon di un kòki Kolombiano. E kòki aki a traha 3 aña largu, 12 pa 15 ora pa dia, 7 dia pa siman na un pizzeria. Ta kulpa e sospechosonan entre otro di a malusá pa 3 aña largu e situashon ilegal i delikado di e kòki i tambe dor di tené na liña ku promesa pa regla un pèrmit di estadia. E kòki nunka a haña su pèrmit. Pa 3 aña largu a retené primanan sosial i di belasting i nunka a paga e 150% di overtaim. Na dado momentu e situashon den e pizzeria a sali for di man i un konosí a yuda e kòki hasi denunsia.

Aña pasá ya e detenshon preventivo di dos di e sospechosonan ku a presentá dilanti wes a keda di skòrs. Djabièrnè ku a pasá, detenshon preventivo di e di 3 sospechoso tambe a keda di skòrs. Esaki ta nifiká ku wes ta aseptá e opheshon serio di echonan kastigabel , esta entre otro trafikashon di hende, pero na e momentu aki, interes personal di e sospechosonan pa nan warda e investigashon penal den libertat ta pisa mas ku e interes di hustisia pa tene nan enkarselá. Ministerio Públiko a indiká ku nan lo no duna resistensia kontra di ‘skòrsing’ di detenshon preventivo, basta e reshèrshi paga 5000,- florin mesora na e víktima, e kòki Kolombiano. Esaki ta un kondishon eksepshonal pa motibu ku e reshèrshi no a wòrdu kondená ainda pa trafikashon di hende. Mas detaye den edishon di EXTRA.