Ta prohibí i kastigabel pa paga un votadó pa su voto

WILLEMSTAD. - Den un komunikado emití pa prensa, Ministerio Públiko (OM) ta alertá riba froude di vota. Manera ta konosí, dia 19 di mart benidero tin elekshon pa un Parlamento di Kòrsou. E diferente partidonan polítiko ta bai hiba kampaña pa logra mas tantu voto pa di e forma ei haña representashon den Parlamento. E loke ku ta di sumo importansia ta pa tin un elekshon liber, sekreto i honesto, loke ku ta base di un estado di derecho demokrátiko. E interes ta ankrá den Areglo di Estado i areglonan internashonal. Un votadó tin e derechi pa basha su voto sin ningun influensia i pa tene su desishon pa su mes.

Na luna di aprel 2017, OM a alertá tambe riba e partikularidat aki, despues di a tuma nota di posibel señalnan ku ta enpugna ku artíkulo 2:44 di Kódigo Penal di Kòrsou. Mester indiká ku e tempu ei a kaba di subi kastigu na dos aña prizòn.

Manera menshoná, elekshon tin ku tumá lugá di un forma honesto. Partisipashon na elekshon ta un derechi atkerí di hopi importansia, ku na hopi pais na mundu no ta un algu usual i normal.

Un manera ku elekshon no ta resultá di un forma honesto ta na momentu ku ta kumpra òf bende voto, sea ku plaka kèsh òf di otro forma manera fabor/promesa. Semper na momentu di elekshon ta yega na Ministerio Públiko señal ku votadó ta laga kumpra nan mes pa vota riba un sierto partido polítiko òf persona.

Esaki ta influensiá un proseso liber i honesto di elekshon i ta ademas tambe kastigabel.

Ministerio Públiko ta mustra pa e motibu aki ku ta prohibí i kastigabel pa paga un votadó pa su voto. Tambe ta prohibí pa haña pago pa vota riba un partido polítiko òf un persona spesífiko. Tantu esun kumprá òf esun ku ta ofresé ta kastigabel konforme Kódigo Penal di Kòrsou ku un kondena di maksimalmente 2 aña.

Ministerio Públiko ta bai ta alerta durante e próksimo temporada di elekshon riba tur señal di soborno. OM ta alerta i ta bai investigá tur señal ku yega serka nan.

E artíkulo ku ta salvaguardá un elekshon liber i honesto ta  reglá den artíkulo 2:44 di Kódigo Penal di Kòrsou.

E lei: Artikel 2:44 Wetboek van Strafrecht Curaçao Lid 1. Hij die bij gelegenheid van een krachtens wettelijk voorschrift uitgeschreven verkiezing door gift of belofte iemand omkoopt om zijn of eens anders kiesrecht hetzij niet, hetzij op bepaalde wijze uit te oefenen, wordt gestraft met gevangenisstraf van ten hoogste twee jaren of geldboete van de vierde categorie.

Lid 2. Met ten hoogste dezelfde straf wordt gestraft de kiezer of de gemachtigde van een kiezer die zich door gift of belofte tot een of ander laat omkopen.