WILLEMSTAD.- Ministerio Públiko ayera a apelá e desishon di e kaso ku a keda yama “Outpost”.
Ta trata di e kaso di 4 agente polisial Dorand, Thomsjansen, Boelijn i Overman, akusá pa vários echo kastigabel.
Tur 4 a keda enkarselá pendiente pa mas investigashon.
Djamars último tur 4 a bolbe presentá dilanti hues komisario pa wak si ta prolongá nan detenshon, pero djárason hues komisario a tuma desishon i a bai di akuerdo ku e defensa pa suspendé nan detenshon den e sistema di aresto domisiliario i ku prohibishon di kontakto komo kondishon di e suspenshon.
Esaki sigur no a kai den bon tera serka Ministerio Públiko, mirando e akusashonnan i a apelá e desishon.
E investigashon Outpost ku ta wòrdu hasí bou di responsabilidat di Ministerio Públiko Kòrsou dor di Ofisina
di Asuntunan Interno (Bureau Interne Zaken) di Kuerpo Polisial di Kòrsou, ta relatá algun ámtenar di polis ku ta sospechá di a hasi nan mes kulpabel na robo den bibienda òf intento pa hasi esaki, violashon di lei
di opio i abuzu di outoridat komo ámtenar.
E kuater sospechosonan ta den kustodia. Esaki ta nifiká ku nan por tin kontakto solamente ku nan abogado.
Ministerio Públiko a resistí pa laga nan den libertat bou di kondishonnan i pa e motibu aki a apelá e desishon. Ministerio Públiko ta spera ku Korte di Apelashon por atendé e asuntu aki lihé.