WILLEMSTAD.- Korte di apelashon a posponé kaso di e funshonario di imigrashon Hendrik “Henki” Calmes (60). Esaki pa motibu ku abogado general Angela tin kebrante di salú.
Ministerio Públiko a apelá e sentensia di 6 luna kondishonal, 120 ora di trabou pa komunidat mas 3 aña di prueba den korte di promé instansia.
Fiskal a demand’é na 30 luna mas 5 aña for di servisio. Ministerio Públiko no a bai di akuerdo ku e sentensia.
Hues den korte di promé instansia no a haña nesesario ku e akusado mester pèrdè su trabou. Durante tratamentu di e kaso Calmes a bisa ku e tin 40 aña ta traha sirbiendo komunidat.
Tabata 25 di sèptèmber 2017 ku Calmes a keda detené na su trabou na airopuerto Hato, relashoná ku violashon di Lei di Opio i tambe sospechoso di korupshon den funshon (ambtelijke corruptie).
Ministerio Públiko a akusá Calmes di 6 echo kastigabel ku e lo mester a kometé.
E ta keda akusá ku den e periodo di 2 di febrüari 2017 te ku 25 sèptèmber 2017, di a permití algun ilegal drenta nos aeropuerto sin e pèrmitnan nesesario kontra pago.
Tambe e ta keda akusá ku den e mesun periodo di a pasa informashonnan konfidensial na terser entre nan un chines yamá Wu via telefòn. Relashoná ku kaso di algun chines ku a keda detené ku stèmpel den pasport, sin ku nunka nan a drenta nos isla.
E ta keda akusá tambe pa hasi mal uso di su funshon di “Teamleider grensbewaking” dor di duna sierto koleganan òrdu pa laga damanan drenta Kòrsou sin niun dokumento, òf pa wak kua kolega tabata na warda, pa purba yuda persona indokumentá drenta nos isla sin pèrmitnan válido.
Tambe Calmes ta keda akusá di a tuma kartanan di invitashon pa estranheronan via mail i regla un ke otro pa ekstranheronan sin dokumento por haña akseso pa drenta nos isla. Segun e akusashon e tabata fia sèn serka e chines ora e yud’é.
Mas aleu Ministerio públiko ta akusá Calmes ku den e periodo di 2 di febrüari 2017 te ku 24 di sèptèmber 2017 e tabatin mas ku 257 paki di koka den su poder.
Por último e ta keda akusá di tabatin 2 gram di koka den su poseshon, na momento ku el a keda detené.
Den korte di promé instansia e akusado a ninga di tabata duna informashon a kambio di sèn. El a bisa ku ta su trabou e tabata hasi semper manera nan a spera di dje.
Hues a revelá ku e akusado tabata duna un persona sèn dos bia pa siman pa kumpra koka pe. El a atmití pero a bisa ku e tin dos aña ku e ta kompletamente “clean” despues di a sigui un tratamentu na FMA i ta bou di guia di ARBO.
Fiskal durante tratamentu di su kaso a haña e akusashon probe i a bisa ku e funshonario a hasi mal uso di su funshon ku ta kontra di su prinsipio di trabou.
Fiskal a hasi un demanda di 30 luna di kastigu di prizòn kitando e kantidat di 35 dianan ku e akusado a sinta , mas 5 aña for di tur servisio di gobièrnu. Calmes na final a pidi korte un chèns pa kaba su karera, despues di 40 aña di servisio sirbiendo su komunidat di kurason.
Hues den su desishon a desviá for di e demanda di fiskal i a kondená Calmes na 6 luna kondishonal mas 120 ora di trabou pa komunidat.
Ministerio Públiko a apelá i lo bin ku un fecha nobo pa trata e kaso integralmente.