WILLEMSTAD.-Ministerio Publiko ta konfirmá detenshon di parlamentario Rennox Calmes awe mainta. Te na e momentunan aki ainda e tim ta trahando duru riba e kaso i bosero Roderick Gouverneur no por duna niun detaye mas, asina el a duna di konosé na EXTRA.
Den e kaso aki a trata di un amtenar i komo tal e detenshon ta tuma lugá den koperashon di tur e instansianan konserní huntu ku landsrecherche. E detenshon a kousa un sentimentu laf den komunidat komo ku ta trata di un polítiko aktivo, miembro di e órgano di mas haltu di nos pais ku ta Parlamento.
Tin yen spekulashon pero EXTRA ta pendiente di Ministerio Publiko ku a primintí ku despues di mèrdia nan lo emití un deklarashon dunando detayenan di e kaso. Keda pendiente di EXTRA.
—–
Ministerio Publiko awe a manda e siguiente komunikado di prensa:
“Djárason dia 26 di yüni 2024, Landsrecherche Kòrsou (LrC) a detené tres persona entre otro un parlamentario di Kòrsou. Banda di esaki, a realisá entradanan hudisial bou di guia di hues komisario na diferente bibienda i den e ofisina di e parlamentario den edifisio di Parlamento na Punda. A konfiská artíkulonan relevante pa e investigashon.
E entradanan hudisial a tuma lugá relashoná ku un investigashon penal di falsifikashon di dokumento. E investigashon ta andando ainda i no ta ekskluí mas detenshon i entradanan hudisial.
Korupshon ofisial ta desestabilisá e konfiansa den i e outoridat di gobièrnu. Finalmente pa e motibu aki un pais por keda desestabilisá si no respondé di un manera adekuá. Ministerio Públiko i Landsrecherche Kòrsou tin atenshon kompletu pa e forma di kriminalidat desestabilisante aki.”
