WILLEMSTAD.- Djaweps promé di sèptèmber ta kontinuá ku e reunion di Komishon Sentral di parlamento ku a inisiá for di 7 yüni riba e tópiko: rumornan di desishonnan dudoso den Fundashon Kas Popular (FKP). Despues di pregunta di miembronan di parlamento gerente di FKP, Arthur Con a pidi 1 siman di tempu pa e por kontestá.

Entretantu kasi 3 luna a pasa, pero e relevansia di e reunion aki a keda apesar ku e impreshon tei ku ta hasi hopi esfuerso pa kita atenshon for di e “Letter Of Intent” (LOI) entre FKP i e HD&M Urban Village Management pa bende propiedat di FKP. Posibel intenshonnan pa privilegiá “friends and family” ta motibu dikon frakshon di PAR a pidi e reunion ku e intenshon pa haña sa kiko ta dje spesial na e área di Rif/Otrobanda i pakiko tin interes pa kumpra sierto monumento den e área.

Un pida evidensia ku no a para ketu na dje ainda den e reunion di parlamento ta ku aparentemente, Ministerio di VVRP mes, bou di responsabilidat di e minister Charles Cooper ku a purba laba man for di e LOI tin plan grandi pa desaroyá e área di Rif i besindario. Den e dokumento di “landenpakket” bou di punto E7.4 ta para “Uitwerking principenota's over gebiedsontwikkelingen Rif en Colon”, komo un di e prioridatnan pa nos ekonomia. Pues, tin plan di desaroyo kla kaba i tambe den desaroyo mas detayá pa e área.

Desaroyo di e área di Rif/Otrobanda riba su mes ta un bon kos i ta algu ku Kòrsou sigur por usa. Corendon tei kaba i lo sigui ekspandé. A traha e parke di Pal’i Mangel, Courtyard Marriott ta den konstrukshon i pa otro aña lo habri su portanan. Tin un hospital “state of the art” den e mesun área i tambe lo bini un desaroyo positivo di e hospital bieu.

Esaki ta djis pa menshoná algun desaroyo positivo ku lo krese ekonomia i trese bida bèk den Rif/Otrobanda. Desaroyo ku tambe lo subi preis di propiedat inmóbil den i te hasta por papia di di área di “prime real estate” mas despues. Esun ku tei kaba òf tei trempan, lo probechá di subida di balor di propiedat i por hasta hasi ganashi supstansial ku tempu.