WILLEMSTAD.- Misa di Lagun ta lusi atrobe, esei pa motibu ku a sera e kas di Dios ku bentana. Un bon alma a mustra komprenshon i a hasi un donashon grandi na e misa pa asina su parokianonan por ta orguyoso di dje atrobe.

T’asina ku resientemente nos a pasa dilanti dje misa menshoná i a nota ku e tin bentana atrobe, i naturalmente nos lo ke kompartí e bista aki ku nos lesadónan.

Manera ta konosí, algu ménos ku dos siman pasá misa di Lagun a bira víktima di un robo grandi kaminda malechornan ku no tin niun klase di rèspèt pa e sitio aki a bai ku un kantidat di bentana karu. E bentananan ei a ser instalá den kuadro di trabounan di renobashon dje misa.

Pero grandi tabata e sorpresa pa Pastor Baak ora ku el a lanta un mainta i konstatá ku deskonosínan a lòs tur bentana bai kuné. E kaso aki sigur ta unu ku ta den investigashon ainda teniendo kuenta ku e tipo di práktikanan aki den e sektor di konstrukshon.

Hopi biaha sa sosodé ku den dia un kontratista ta instalá bentana i portanan, pa despues den oranan djanochi “deskonosínan” los nan tur bai kuné. Den kaso di misa di Lagun a trata di un invershon di den kareda di fl. 10.000.-, di akuerdo ku deklarashonnan di Pastor Baak na prensa lokal.

Den e kaso aki pa hopi dia a tapa burakunan di e bentananan ku plèstik, aunke for di momentu ku e tristu notisia aki a bira konosí, a sali inisiativanan privá pa hasi donashon di tantu bentana komo alarma pa e misa.

Di parti di EXTRA, nos ta spera no solamente ku malechornan lo demonstrá mas rèspèt pa tèmpel di e Ser Supremo, pero ku nan lo realisá kuantu daño nan ta kousa na un iglesia i su siguidónan.