WILLEMSTAD.- Ayera atardi outopsia di e hòmber ku a fayesé despues di un persekushon polisial, a finalisá. Polis tabata persiguí un vehíkulo ku tres hòmber aden despues ku nan a kaba di tira atrako riba un Minimarket na Dr. Maalweg djaluna 27 di sèptèmber último.

Pero pa straño ku por parse, tin henter un misterio rondó di e rapòrt di outopsia.

Bosero di Kuerpo Polisial di Kòrsou Imro Zwerwer a konfirmá ku e outopsia a finalisá i ku rapòrt tambe ta kla pero ku no por papia òf bisa nada ainda relashoná ku e resultado. Segun Zwerwer, mester kaba di haña kontesta di algun hende, promé ku disidí ken ta esun ku lo sali papia di e resultado. Esun ku normal ta papia riba resultado di outopsia ku ta Ministerio Públiko mes no a tende nada di e resultado. Probablemente ta Ministerio Públiko mes lo sali papia den e kaso aki tambe.

EXTRA a komprondé ku e rapòrt final di outopsia a bai pa Landsrecherche.

E hòmber ku a pèrdè su bida,   Zjeancerre Melanio Edgar Nicasia, nasé na Kòrsou, 22 di òktober 2002 huntu ku dos otro mas, a kaba di tira atrako riba e dia en kuestion. E tiponan aki tabata manehando riba velosidat haltu direkshon pariba. Riba kaminda Duvert “Boy” Nicolina unidatnan polisial a señalá e vehíkulo aki i a kuminsá un persekushon.

Na diferente okashon a duna e shofùr òrdu pa para, pero sin resultado. Durante di huida

pa polis, e vehíkulo den kua e sospechosonan tabata, a aksidentá den diferente outo riba e

ruta ei. Polisnan a lòs vários tiru di atvertensia dirigí riba e vehíkulo pero e tiponan aki no kier a para e vehíkulo. Parti patras di vehíkulo di e sospechosonan a keda tur na perforashon di bala.

Yegando na e krusada Kaminda Jose Anthonia i Kaya Titiario, e vehíkulo di e sospechosonan a dal kontra di un otro outo di famia, kibra un palu di lus i despues bai bòltu den un kurá di kas na e skina di Kaya Titiario.

E víktima ku a pèrdè su bida tabata den e vehíkulo huntu ku e dos otro sospechosonan B.S.K. di 22 aña di edat i A.W.P.C. di 18 aña di edat, ámbos nasé na Kòrsou ku a keda detené mesora.