KRALENDIJK – Tin un misterio grandi rondó di desaparishon di e piskadó Ulrich Pinedo. For di djaluna anochi famia a bati alarma ku nan ser kerí no a regresá for di laman. For di djaluna anochi diferente boto lokal, Wardakosta, helikòpter i avion a buska, pero sin resultado. Te ku ayera tardi no tin ningun informashon adishonal relashoná ku desaparishon di Ulrich. Manera ta su kustumber, Ulrich a subi laman djaluna mardugá, e biaha aki no den su mes boto, pero e boto Flipper numerá B-977. Ta trata di un boto di faiber di mas òf ménos 15 pia ku motor pafó. Normalmente e ta piska mas na e parti di kosta pabou. Otro piskadónan ku tambe a subi laman djaluna, a mir’é por último ankrá pa sùit di e waf di Cargill, na altura di e stashon di pòmp di Cargill, di einan no a mir’é mas.

Búskeda

Wardakosta a dirigí e avion Dash, helikòpter i un patruya na Boneiru, pa mesora hasi un búskeda di e piskadó i su boto Flipper. Konhuntamente ku partnernan na Boneiru i piskadónan lokal ta trahando duru pa lokalisá e piskadó pèrdí mas lihé posibel.

Posibel prueba

Djamars den oranan di atardi Kuerpo Polisial a bin topa ku algun artíkulo i parti di un boto den besindario di BOPEC. Ta trata aki di algun palu blou, djùk di gasolin i un bui. Investigashon enkuanto e orígen di e boto aki a inisiá. Den e fase aki di e investigashon Polis no por konfirmá ta kua boto esaki ta ainda.

Rumor

Tin diferente rumor ta sirkulá. Tin bisá ku a haña e kaha di as. Skalchi, ku Ulrich ta usa na altura di Pink Beach. Tambe a haña un tanki di gasolin. Piskadónan ku tin hopi eksperensia ta keda straño si akaso mes e loke a haña na altura di BOPEC por ta parti di e boto Flipper. Último biaha ku a mira Ulrich tabata na altura di e waf di Cargill. E dianan aki koriente ta saka mas tantu sùit i ta hopi difísil pa e partinan di e boto yega te na altura di BOPEC. Pero kiko por a bai robes. Piskadónan di eksperensia ku nos a papia kuné a referí na diferente posibilidat. Asina por a tende di nan ku kisas momentu ku Ulrich tabata regresá na marina di Plaza Resort kaminda e boto ta mará por a dal riba algu duru ku e boto por a kibra. Esei nan ta referí mas tantu na e echo si enbèrdat e loke a haña na altura di BOPEC ta parti di e boto Flipper. Tin otro posibilidat, esta ku e por a pega piská grandi i e piská a sak’é for di e boto. Pero esaki kasimente no ta posibel, pasobra e boto e ora ei mester a keda riba anker. Tambe si algu por a pas’é i el a bira malu, pero unda e ta, ta pregunta ku ta bini dilanti.

Misterio

Pa famia desaparishon di Ulrich ta keda un misterio. Un persona ku semper a piska su so i konosé laman bon. E no sa regresá muchu lat for di laman. Ulrich ta un persona hopi konosí den komunidat na Boneiru, un persona alegre ku gusta su fiestanan. Semper despues ku e yega for di laman i kaba entregá piská, e ta pasa serka su amigunan pa dal nan kuba di kuantu piská el a pega laga bai i kuantu el a kue, pero su amigunan no tabata ker’é, pasobra nan tabata konos’é bon. Unda Ulrich ta, tanten ku no sa unda e ser kerí ta, famia no por ta trankil. Ayera tardi Kuerpo Polisial a informá ku investigashon a mustra ku e loke a haña na altura di BOPEC, no ta pertenesé na e boto Flipper.