WILLEMSTAD.- Dia 15 di sèptèmber 2020 un informashon DA di Merka a manda un “melding” Kòrsou kaminda nan ta informá ku tin un lote grandi di droga ku a yega Kòrsou fo’i Venezuela i ku e merkansia ta skondí na un adrès na Punta Cardonweg.
Polis mes ora a aktua i a bai e adrès menshoná. Na nan yegada polis a haña 5 kliko ku vários blòki ku a resultá di ta kokaina.
Na total e kantidat di droga a pisa 342 kilo.
Relashoná ku esaki polis a detené e hòmber Oscar Da Camara (57), komo esun responsabel.
Segun e akusado algun par di dia promé, su outo a para kuné riba Suffisantweg.
El a baha fo’i outo i a habri su tapa di mashin. Direpente un hòmber deskonosí pe, a para i puntr’é ku ta problema e tin ku su outo.
Despues e hòmber a kue konfiansa i a kuminsá papia kuné. Den e kombersashon e hòmber a bis’é ku e tin un trabou pe.
E hòmber a splik’é ku e tin un tiki droga pa e warda pe, pero e hòmber no a bis’é kantidat.
Despues di algun dia, e hòmber a bin trese e droga nan pe i a bis’é pa e pone nan den su Kliko.
Ora ku el a wak e kantidat di droga, el a bisa e hòmber ku esei ta muchu hopi, e hòmber deskonosí a keda bis’é pa yud’é.
Segun e akusado, e no sa ken e hòmber ta i nunka promé a mir’e. E no sa unda e ta biba, su number di telefòn ni su nòmber kompleto. Uniko kos ku e sa ku nan ta yama e hòmber Pompa.
E hòmber a bis’é promé ku e lo a haña 100 florin pa e kantidat di droga ku el a trese, pero e no a spera ku tabata dje tantu ei.
Hues a bisa ku esei ta straño pasó ta hopi droga i no ta lógika ku un hende ku no konosé e persona, ta duna tantu droga asina, sin e konfiansa ku e hende no ta bai bende òf hasi algu otro ku e droga, mirando ku ta trata di un kantidat mionario.
Kasá di e akusado a deklará na polis ku e Kliko nan tabatin 6 luna poné riba e tereno.
Segun e akusado, el a haña e Kliko nan serka su ruman ku a muri, debí ku e ta limpia kurá pa hende i tambe den bario.
Hues a puntra e akusado dikon el a tuma e rísiko ei, el a bisa ku dor di e krísis di COVID, el a kai atras.
E ta sufri di e malesa Colibri i e mester tene su “weerstand” haltu i dor di esei el a hinka su kurpa den e kos aki, pa asina e haña sèn.
E akusado a pidi pordon i a bisa ku nunka mas e lo hasi algu asin’ei.
Ku awa na wowo el a bisa ku e ta hopi tristu i piskalat ta pa niun hende. E anochi nan ta largu i dor di su edat e ta oriná mas tantu ku normal i p’esei, ei den no ta bida.
Fiskal Bennet ta kere ku e akusado sa mas di Pompa. Segun fiskal e balor lo ta 3 mion 249 mil riba kaya i na Hulanda lo e tabatin 17 mion euro.
Fiskal a bisa niun organisashon kriminal ta tuma niun rísiko, pa duna ken ku e ta e kantidat di droga pa warda pe.
Pues e lo a haña mas di 34 mil florin pa warda e droga.
Fiskal ta tene kuenta ku su salú, karchi kastigu blanku i tambe ku el a atmití mes ora.
Mirando esakinan fiskal ta hasi demanda di 5 aña di kastigu
Su abogado mr Athena Sulvaran ku a hiba e defensa a bisa ku akusado ta biba den pobresa mirando ku ta solamente 700 florin e ta haña pa e ku su kasa biba fo’i dje. Segun su abogado e akusado ta un persona honesto i ku prinsipio i esei esun ku a dun’é e droga nan tene pe, a ripará.
E abogado a pidi pa baha e kastigu debí ku e akusado tin un hèndikèp na su pia i kasi no por kana.
Hues a haña e kaso unu “a-típiko” fo’i e kasonan normal. Apesar ku ta trata di un kantidat grandi di droga hues a bisa e ta tene kuenta ku su salú, edat, ku el atmití i su karchi kastigu ku ta blanku.
Hues a yega na un kondena di kuater aña di kual 1 kondishonal ku pedido di prueba di 3 aña.