WILLEMSTAD – E luna akí, Centrale Bank van Curaçao en Sint Maarten (CBCS) lo emití dos moneda konmemorativo nobo: un moneda di plata di 5 florin na honor di e di 50 natalisio di Su Mahestat Reina Máxima (EXTRA a relatá esaki kaba) i un moneda di plata di 5 florin konmemorando 90 aña di Krus Kòrá Kòrsou.

Nobenta aña di Krus Kòrá Kòrsou

E siman akí, Krus Kòrá Kòrsou a selebrá 90 aña di eksistensia. E promé Krus Kòrá na mundu a keda fundá na 1863 pa Henry Dunant, un empresario suiso, na rais di un bataya entre Fransia i Austria. Dunant a yuda duna kuido na e sòldánan heridá riba kampo di bataya. Banda di esei, bou di e lema ‘Tutti fratelli: Nos tur ta Ruman i nos tin ku yuda otro’, el a mobilisá e poblashon lokal i nan tambe a duna un man. E gesto fraternal akí a inspir’é pa funda un organisashon neutral pa ofresé ousilio den tempu di guera: Krus Kòrá. Entre tantu, e organisashon a krese i bira e ret di ousilio mas grandi na mundu, ku organisashon lokal den 192 pais. Na 1931, Kòrsou a haña su propio filial di Krus Kòrá. E dunadónan di asistensia di Krus Kòrá ta brinda asistensia humanitario na Kòrsou i e islanan den serkania ora ta nesesario. Despues di desaster natural i di otro índole, e ta brinda, entre otro, alohamentu safe na esnan ku ta den un posishon vulnerabel. Tambe e ta parti pakete di kuminda, duna kuido médiko i yuda ku rekonstrukshon.

Diseño i edishon di e moneda di plata di 5 florin na okashon di 90 aña di eksistensia di Krus Kòrá Kòrsou

E moneda akí tambe a ser diseñá i produsí pa Koninklijke Nederlandse Munt riba enkargo di CBCS. Na su banda dilanti, e moneda di plata di 5 florin tin e isla di Kòrsou i, riba dje, logo di Krus Kòrá Kòrsou i e añanan 1931-2021. Riba e logo por mira e dos streanan di bandera di Kòrsou. Parti abou, tin e palabranan ‘Tutti Fratelli’, ‘Wij zijn allen broeders’ i ‘Nos tur ta Ruman’. Na e banda patras di e moneda tin eskudo di Antia Hulandes ku menshon di e pais, e denominashon ‘5 G’ (florin) i e aña 2021. Tambe por mira e asina yamá ‘muntteken’ i e ‘muntmeesterteken’. A produsí e moneda di akuerdo ku e nivel di kalidat mas haltu, konosí komo ‘Proof’, i e ta bini den un estuche ku su Sertifikado di Outentisidat. E edishon ta limitá na 350 moneda individual. Por lo demas, e moneda ta sirbi komo medio legal di pago na Kòrsou i Sint Maarten, ku un balor nominal di 5 florin.

CBCS tin un kantidat limitá di e monedanan akí disponibel pa benta i esei lo kuminsá na yüni. E preis di benta fihá pa e monedanan akí ta NAf 148,50 pa un. Pa mas informashon, bishita nos wèpsait https://www.centralbank.cw/functions/banknotes-coins/commemorative-coins.