WILLEMSTAD.- E Florin Karibense tambe tin 7 moneda ku tin kambio, i alabes nan ta magnétiko. Tur esaki ta pa halsa e seguridat di e sèn kontra di sèn falsu. Tur e monedanan, kuminsando for di 1 sèn te ku 50 sèn, ta nikel i tambe tin e koló shinishi. Tur e monedanan ta rondó, pero kada unu tin nan karakterístikanan pa por rekonosé nan. Esaki prensa por a tuma nota di dje ayera ora ku a haña e monedanan pa mira durante un sekshon informativo di Banko Sentral di Kòrsou i St. Maarten.
Di akuerdo ku Banko Sentral ku e “1 sèn” tei ketu bai, pasombra a trata di bin ku un proyekto p’asina eliminá e “1sen”, pero esaki no a resultá. Ademas e 25 sèn i e 50 sèn, nan rant ta diferente, miéntras ku den nan por mira diferensia di algun punta ku tin. Pa loke ta trata e moneda di 1 i 5 florin, tin e potrèt di Kòrsou ariba i ta rondoná pa awa di Karibe. E olanan ta formá pa e nòmber “Curaçao”. E moneda dje isla di St. Maarten tin eskudo dje pais ariba. Ámbos moneda tin dos turtuga ta landa kara pa otro i asina ta simbolisá e unidat monetario dje dos paisnan di den Reino. E otro banda di e monedanan tin kara di Rei Willem ALexander i ku e palabranan ariba skirbi “Koning der Nederlanden”. Tambe e moneda di 1 i 5 florin ta diferensia di otro na koló i grandura. Kontrali na e moneda di Naf5.-, esun Florin Karibense no ta “pisa”.
Dia 31 di mart awor e Florin Karibense ta hasi su entrada na Kòrsou i St. Maarten. Te ku 30 di yüni 2025 por kambia e sèn dor di hasi kompra kèsh. Despues di 30 di yüni 2025, por hasi e kambio na bankonan komersial te ku mart 2026. E persona ku no tin kuenta di banko por akudi na Banko Sentral pa hasi kambio, pero mester tene kuenta ku algun rekisito.