WILLEMSTAD.- Awe mardugá un aksidente riba Corriweg a kosta bida di un persona. Polis ta informá ku den kareda di 5 pa 3 di mardugá tabatin un aksidente riba Corriweg ku a kosta bida di un hòmber. Durante di patruya, polis a duna shofùr di un vehíkulo ku tabata kore riba Corrieweg direkshon Snipweg, òrdu pa para pa un kontrol. E dama shofùr a para e vehíkulo i na momentu ku e agentenan tabata aserkando na e outo e dama a ranka bai. Polis a bai tras di e outo ku na e momentu ei a subi Snipweg i lora drenta den Matanciastraat ku velosidat hopi haltu. Na krusada Matanciastraat / Kaya Akoerio shofùr di e vehíkulo a krusa e kaya, basha parti di kura di un kas riba Kaya Akoerio abou pa despues subi riba stupi di e kas i para. Despues di e impakto e dama shofùr a baha for di e outo i bai skonde den e kas. E otro okupante di e outo a keda heridá den e outo. Ambulans a transportá e hòmber okupante den situashon di preokupashon pa poliklínika di SEHOS pa tratamentu médiko. Polis a detené e dama J.C. nasé na Venezuela di 23 aña di edat. Den kareda di 1 minüt pasa di 10 di awe mainta polis a keda informá ku e okupante a fayesé.

Su identifikashon no ta oficial ainda.

Mas detaye lesa EXTRA mainta.