Morto den tráfiko na Aruba

ORANJESTAD.- Aruba a registrá otro kaso di morto den tráfiko awe mainta. Mas o ménos 8’or awe mainta sentral di polis a haña notifikashon di un aksidente serio ku a tuma lugá entre di un outo di famia i un motersaikel na altura di Ting Wei Supermarket na Rooi Santo. Na yegada di e prome patruya na e sitio a pidi ambulans mesora una bes ku a tuma nota di e situashon serio i delikado di e shofùr di e motersaikel.

Spesialistanan di tráfiko tambe a bai na e sitio pa hasi e investigashon tékniko. E prome informashon ta indiká ku probablemente ku e outo Hyundai Getz kolo blou, numerá A-48943 ku tabata bai den direkshon noord lo a krusa dilanti di e motersaikel numerá MFA-1701.

Ambulans a transportá e víktima ku urgensia pa hospital, pero pa 09:08 dòkter a konstatá morto di e shofùr di e motersaikel ku na bida ta yama Rofles H. Liesdek nasé dia 2 di febrüari 1975 na Sürnam. Di e forma aki Aruba a registrá su di 4 morto di tráfiko pa 2019.

SHARE

LEAVE A REPLY