WILLEMSTAD.- E dama ku a fayesé na kuminsamentu di siman pasá na aeropuerto a muri un morto natural. Esei di akuerdo ku bosero di polis. Den un boletin polis ta bisa ku djárason 2 di òktober 2024, un dama di nashonalidat kolombiano a fayesé na aeropuerto Hato, na momentu ku e tabata di regreso pa su pais di orígen.

E dama aki di kua su atmishon na Hulanda a keda rechasá, a biaha bèk pa Kòrsou, pa via di Kòrsou e keda deportá pa su pais. Despues ku el a sinti su kurpa malu na aeropuerto, a dun’é promé asistensia, pero sin e resultado deseá. Relashoná ku su fayesimentu, a laga hasi outopsia riba e kurpa, i resultado di e outopsia a konkluí ku e dama a fayesé bou di sirkunstansia natural.