WILLEMSTAD.- Fayesimentu di sra. Enith Fernan a kai duru i konmové e mundu di taksi aki na Kòrsou. Esei EXTRA por a komprondé for di un kòmbersashon ku algun taksista ayera nochi. T’asina ku ayera mainta famianan di Enith a anunsiá su morto den medionan di komunikashon sosial, i esaki tabata tópiko di kòmbersashon. Na bida Enith no solamente tabata taksista (Taxi-88), sino tambe a asumí e puesto di visepresidente di Sinusta, ku ta e organisashon sindikal. E tabata un di esnan ku semper a kere den instalashon di meternan di taksi.
Segun e taksistanan, maske nan ta na altura ku Enith tabata sufriendo di un malesa, tòg su morto a konmové nan i ku un sierto grado di sorpresa. Komo miembro di direktiva di Sinusta nan a siña hopi for di su eksperensia i komo tal semper Enith lo keda den nan memoria.