WILLEMSTAD.- Ku 4 voto pro i 9 voto kontra e moshon ku frakshon di PAR i MAN a presentá pa yuda Sentro di Bario Otrobanda a keda rechasá den parlamento ayera.

Segun e moshon ta bisa ku Sentro di Bario Otrobanda (SBO) for di 1992 ta sirbi komunidat i di Otrobanda i entorno. E sentro bario ta organisá aktividat di konosementu di informashon, konsientisashon i entretenimentu. Resientemente korte a dikta ku SBO ta obligá pa kumpli ku e akuerdo di hür ku FKP kual ta pago di hür na di 2900 florin pa luna. SBO no ta hasi un negoshi ku e meta di haña ganashi, i esaki ta nifiká ku SBO no tin fondo pa paga hür di 2900 florin, lokual tabata konosí pa FKP for di aña  1992. Ademas SBO a sinta  ku FKP diferente biaha riba e tópiko aki. Semper FKP a keda di bai deliberá internamente sin nunka a tuma un desishon final.  Den presupuestonan di pais Kòrsou  2018-2019 a hasi menshon ku lo yega na un akuerdo ku SBO pa realoká e sentro di bario pa edifisio di Landhuis Kortijn.

P’esei ta urgi  Gobièrnu kumpli e akuerdo entre gobièrnu i SBO pa loke ta trata realokashon di e sentro di bario; Miéntras  ta traha riba realokashon di SBO, yega na un akuerdo ku FKP pa ku e hür ku FKP ta kobra SBO. Asina aki SBO por sigui hasi uso di e edifisio na St. Maartensteeg 1 den Otrobanda.

E  moshon aki ta firma pa frakshonnan di PAR i MAN.  Parlamentario sra. Ana Maria Pauletta a lamentá ku e moshon aki no a risibí sosten di parlamentarionan di oposishon. Pauletta a indiká ku si parlamento no hasi nada aki 6 luna SBO mester sera su porta. Pa 31 aña e sentro ta sirbi komunidat i Otrobanda. E parlamentario sa ku oposishon lo usa e sentensia lo hasi uso pa bai kontra di e moshon. Pero e sentensia a duna parlamento chèns pa duna su opinion i espasio pa sigui kana komo miembro di parlamento i gobièrnu. Si no aseptá pa duna boluntarionan eifó un rekonosementu,  nan trabou lo ta envano i ku palabrashonnan hasí den pasado ta ser poné un banda. Palabrashon a ser hasí ku tur direktiva for di 1992 te ku 2022 lo buska un solushon ku e hür. Den presupuesto ta hasi menshon di Landhuis Kortijn komo un sentro multifunshonal i pone sentro di bario ei den.  Pauletta ta pidi pa realoká e sentro di bario i pa papia ku FKP kiko por hasi ku e hür di 2900 florin.

Sr. Gilbert Doran di MFK a indiká ku e moshon no ta malu pasobra e tambe tin preokupashon, ounke e no spera gobièrnu lo laga sera e SBO. E no ta di akuerdo ku e preis di hür ku ta 2900 i ta demasiado eksagerá pa un sentro paga pa luna. Pe echo ku ya tin un sentensia no por bai kontra di dje. P’esei frakshon di MFK no por bai di akuerdo ku e moshon. Doran ta spera gobièrnu i FKP pasa mana na kurason òf buska lugá pa realoká SBO, pasobra e tin su derechi eksistensia.

Sheldry Osepa parlamentario a mustra riba e echo kon por ta posibel ku nunka SBO su direktiva no a paga hür.  Tin sentensia. E ta mira ku ta un par di hóben bon yu di Kòrsou a lanta fundashon i ta hasi trabou boluntario, ta keda sin paga, i ta pidi wes pa eksonerá nan debe. No por lanta un fundashon, kon bon intenshon por tin, pero ta keda sin paga. Tin di regla e parti aki formal. Osepa finalmente a pidi e boluntario pa regla nan kosnan i bai na e instansia konserní pa pidi supsidio. manera indiká e moshon a keda rechasá 9 kontra, 4 pro.