WILLEMSTAD.- Den e sektor di maestro di skol tin basta mal kontentu. Nan no ta haña ku e trato ku ta hañando di nan doño di trabou den e kaso spesífiko aki gobièrnu ta na su lugá. I EXTRA a tuma nota di un app ku ta bai rònt pa pidi pa mihó no bai studia pa yùfrou òf mener di skol. E ta bisa lo siguiente;

Kualke otro persona ku HBO ku a studia mesun tantu 4 aña ku e maestro, lo gana 2 biaha, tin biaha 3 biaha mas tantu i hasta hende ku ménos estudio, ku ta traha den sierto sektor priva ta gana mas ku un maestro.

Tin solamente 9 direktiva di skol; Tur ku nan propio ideologia i nan mes ta skohe ken nan lo pone komo kabes òf funshonario. Den enseñansa no tin chèns pa krese. Te ku 65 aña tin ku para dilanti klas. No tin un otro ‘afdeling’ i no tin kresementu komo manager, ni maske kuantu papel tin. Ta skohementu i nombramentu tin pa bira kabes i no tin mas chèns.

E maestro mester ta na skol fo’i 7 or mainta i traha bo oranan. Skol FO ta kaba 12.30. Skol VO ta kaba 2.00, tin biaha te 3.00. Pero ora kaba skol tin ku ‘kijk na’, atendé ku planning, kisas atendé ku kaso di mucha i mayor, ke men e maestro no ta kla ni pa 3.00. Awendia no tin di duna lès so. Mester hasi tarea atministrativo tambe. ‘Hou bij’ yen kos ku no ta kai bou di e maestro, tin biaha hasta limpia klas, kos ku ta trabou di un ‘werkster’.

E maestro mes tin ku saka sèn pa material ku e mester pa bo traha, pen tipèks,  linial, blòknot etc Tin skol ta duna e maestro un bòks ku e mester drai kuné henter un aña eskolar.

Esun ku ke su klas un tiki agradabel, e mes mester fèrf e, kumpra kortina, laga kose, kumpra poster kartulina pa hasi e esfera agradabel. Banda esei kumpra ‘plakplaatjes’ pa rekompensa mucha. I na skolnan marginal, drecha pan pa mucha kome.

Niun libreria no ta koperá ku dosente pa artíkulonan di skol. Niun negoshi ta duna sèn i material pa yuda dosente. Fo’i nan mes saku tur kos ta bai. Awendia tin ku hasi uso di selular personal pa app mayor i alumno. I trabou no ta ni duna un selular, ni ta paga wifi di kas. Pero mester tin e si. Tambe e maestro mester tin laptop. ‘Uit eigen zak’.

No tin sèn pa duna un regalo dia e maestro hasi aña. No tin sèn pa duna e maestro pa gasta den fakansi. No tin sèn pa hasi ‘borrels’ 1 bes pa luna. No tin sèn pa kumpra produkto pa higiena. No tin sèn pa nada. P’esei skol lo keda un lugá laf i morto. Paso no tin sèn pa drecha ni e lokal, ni e edifisio, ni pa muebel. Ni pa artíkulonan di skol. Kemen e esfera i aparensia di e lugá den kua lo traha ta malisimo. Hèkwèrk kibra. Nada di esfera di seguridat.

Komo ku mayoria kolega ta mal fada ku e situashonnan. Tur dia e karanan ta zür. Pues ta drenta den un mal vibe tur dia bai traha. I esaki ta chupa energia. A lo largo e maestro tambe lo bai tin mal vibe òf ta hunga komedia (hasi komo si fuera tur kos ta okay i bon)

Muchanan ta riba ‘device’ i no tin interes pa sinta skucha 5 ora largu ta instruí na skol di fundeshi. I hóbennan sigur ta demotivá pa bin lès 45 minüt sinta den banki pa skucha un dosente. Komo ku hopi mucha no a ser eduká na kas nan ta welt, sin edukashon (loke por konsiderá komo onbeschoft) i demotivá. I nan mundu digital no ta kuadra mas ku maestronan 40+ ku ta kompletu otro. Imaginá un maestro di 60+ tin ku duna ‘kleuter’ lès. Ta manera oma ku ñetu. Kòrda tin ku traha te 65+.

Hopi maestro a flep òf a haña burnout. Pero nunka a haña yudansa. Kiko nan ta hasi. Grita mucha. Dal mucha. Papia malu ku mucha. Esaki ta pone ku tin un sirkulo visioso den enseñansa. Ta maltratá mente di mucha ku ainda por krese bon i ku tin speransa pa nan. Hopi maestro ta kibra e muchanan. E sistema di enseñansa mes ta limitá hende. Dor di dropout. I no tin skol pa adulto. Sigur no riba nivel WO. Pues emoshonalmente tin hopi karga ku no por hasi nada na dje. I asina tur lo keda den un sirkulo i no tin adelanto.

Maestronan mester keda bai yen ‘nascholing’, pa keda yena nan tempu, pa nan no pensa, djis keda besig, pero tur e konosementu èkstra no ta aportá pa nan kresementu den salario òf ku nan por krese den nan trabou. Ta keda duna tarea i lès na dosente.

Mayornan ta falta maestro rèspèt. Asina bisa e mucha algu, ta haña mayor riba bo. Mucha no ta tuma e korekshon. Tin rabiamentu. Na final di aña eskolar, no ta duna ni danki. No ta aparensia e maestro ku regalo durante aña. Tur mayor ke bon trato pa nan yu, pero ta trata e maestro manera ta un kria e ta, ku semper mester ta disponibel, semper mester tin tempu i ku tur kos mester sosodé ora e mayor of mucha ke. Muchanan tin nan mes roster den e roster di skol.

Puntra un hóben si e ke bira dosente. E ta bisa bo nunka. Paso e sa kiko ta pasa den klas. No tin invalsters, paso ora e hende sali fo’i enseñansa el a haña su libertat i no ke hasi e trabou ei nunka mas.

Konsehá e muchanan ku si nan tin ku bai siña 4 aña riba nivel HBO tòg, nan skohe algu mas mió i satisfaktorio. Sigur algu ku nan por krese komo profeshonal. I ku ta duna un mió salario.

Sèn no ta tur kos. Pero sèn ta esensial pa biba. Hende mester di sèn pa kumpra kuminda i otro nesesidatnan. Sin sèn ba bira pober i no tin entrada pa bo paga gastunan di luna i kuida bo yunan. Anto bo no por stens riba gobièrnu pa haña ònderstant òf Now, paso lo bo keda warda i warda, sin keda kla mayoria biaha. I e saku di komestibel ta yuda pa un ratu. Pero e ta kaba. Sigur ora famia ta grandi i tin hopi boka pa kome.

‘Kemen bai studia na yòn...i studia un profeshon HBO ku ta paga bo bon’, esaki tabata mensahe di maestronan fada.