WILLEMSTAD.- Minister-presidente Eugene Rhuggenaath ayera a duna di konosé ku poko poko pero sigur ta habriendo mas sektor. Entre nan tambe ta sektor turístiko. Tres dia pasá Hulanda a duna Kòrsou kódigo hel, ku ta nifiká ku hulandesnan por bin Kòrsou pa selebrá nan fakansi. Hopi turista a buk un fakansi kaba. Banda di esei gobièrnu di Kòrsou ayera a suavisá mas medida, entre otro a habri playanan. For di ayera por a mira mas aktividat turístiko riba nos kayanan. Entre otro un grupo di turista ku tabata kore riba quad. Pero tambe por a mira algun outo di hür nobo nobo pa sektor turístiko koriendo rònt. Tur kos ta indiká ku sektor turístiko na Kòrsou ta kla pa invitá mas turista.