WILLEMSTAD.- Ayera 4 di yanüari, tabata e promé djadumingu di aña 2021, i riba e promé djadumingu di aña semper sa tin e tradishonal “Fuikdag”.

Ya pa algun siman Wardakosta i polis ta atvertí ku lo tin kontròlnan estrikto i ku bou di ningun sirkunstansia lo no permití hende organisá e aktividat aki tòg òf aglomerá riba boto na otro sitio riba laman òf den bahia di Fuik. Wardakosta i polis pa algun siman a kuminsá  kontrolá moveshonnan riba laman, pa asina evitá ku hende por hasi algu similar riba otro fecha.

EXTRA a tuma kontakto ku bosero di Wardakosta Shalick Clement kual a indiká ku te ku ayera nochi e dia aki a kana hopi trankil. Wardakosta a patruya for di Westpunt te Klein Kòrsou i tabata hopi ketu. Tambe nan tabatin sosten di e helikòpter di polis i tambe i boto di Wardakosta “cutter”. E helikòpter a kore kosta i yuda hasi kontròlnan. Na un okashon a tuma nota di algun boto stashoná banda di otro i mesora a hala atenshon di esnan riba e boto i rekordá nan ku no ta permití mas ku dos boto banda di otro. Nan a kumpli i a bai for di e sitio.

Pues finalmente por bisa ku komunidat en espesial esnan ku sa trafiká hopi riba laman a kumpli i a duna oido na petishon di outoridatnan.