WILLEMSTAD.- E forma kon Ministerio Públiko a terminá un akusashon penal ku tabatin kontra di mama i ruman hòmber di Luigi “Pretu” Florentina ta poko straño. Esaki ta loke ku abogado mr. Franken a trese dilanti den su defensa den kaso Maximus. Mr. Franken ta defendé eks minister George “Jorge” Jamaloodin, kende ta keda konsiderá komo esun ku a provoká morto di lider polítiko Helmin Wiels dia 5 mei 2013.

Pretu Florentina ta un dje hòmbernan huntu ku Burney “Nini” Fonseca ku ta keda señalá komo esnan ku lo mester a haña sèn serka Jamaloodin pa likidá Wiels.

Pretu Florentina a kometé suisidio den su sel na Barber.

Un dje testigunan den kaso Maximus, ta e hòmber Boutisma ku ta ruman di Pretu. Boutisma a deklará ku su ruman Pretu a bis’é ku e  tin trabou grandi pa hasi. Ora e kaba di hasi e trabou aki, i ku e tin e “hendenan” den su man, e ora ei Boutisma por haña un trabou na CPS òf na Speedy Security. Pero kua ta e trabou grandi, Pretu no a bisé.

Boutisma a bisa ku su ruman ku Nini tabata bon amigu di otro. Boutisma no ke a papia promé despues di morto di Wiels, pero te na 2017, despues ku Nini a keda sentensia i ta sera. Segun Boutisma e ta papia awor, pasobra e tabatin miedu di Nini den pasado, hendenan a bai para grita na kas di su mama i ruman pa nan mira bon kiko nan ta papia.

Boutisma i su mama (mama di Pretu tambe) a keda sospecha di labamentu di plaka (plaka di Pretu ku ta bini di krímen ).

Loke a keda un pregunta pa mr. Franken ta ta dikon Boutisma i su mama no a keda detené den e kaso penal aki di labamentu di plaka. Mesora ta yega na areglo/ transakshon finansiero ku e famia di Pretu pa nan entrega un tereno na Sta. Rosa ku Pretu i Nini a kumpra ku plaka dje krímen aki, i tambe mas sèn ku nan tabatin di Pretu i dos vehíkulo. Sinembargo e vehíkulonan tòg ta bai bek pa e ruman di Pretu. Mirando esaki, mr. Franken a pone bastante interogatorio tras di deklarashon di Boutisma.

Mas aleu tin grabashon di Boutisma ta papia ku su ruman Pretu na momentu ku esaki tabata sera ainda. Den e kombersashon aki, Pretu ta nenga na su ruman di tin algu di aber ku asesinato di Wiels.