WILLEMSTAD.- Ayera tardi na momentu ku un patruya tabata atendiendo ku un aksidente di tráfiko den área di Marchena, nan a tuma nota kon un hende hòmber relativamente hóben a kuminsá aktua di forma sospechoso na momentu ku el a tuma nota di e patruya na e sitio.

Na momentu ku e hóben aki a tuma nota di polis el a bira nèrvioso i dado momentu a kana bai na un kos di sushi den e área i a tira algu aden.

E patruya mesora a bai atendé ku e hóben aki i mesora a konstatá ku e lo mester a tira un kantidat di droga den e ko’i sushi.

Mesora a detené e hóben sospechoso aki i a konfiská 2 saku di mariwana,1 saku di hash i tambe un crusher ku e hóben tabatin den su poder.

A resultá ku ta trata di un hóben/mucha di apénas 16 aña di edat ku ya a hinka su mes den problema ku hustisia pa medio di droga.

Despues a hiba e sospechoso pa warda di reshèrshi kaminda el a keda presentá  dilanti di un fiskal ouksiliar ku a pidi presensia di su mayornan na warda di polis.

A atendé severamente ku e hóben aki.