WILLEMSTAD.-Esaki ta loke a sobra di e ‘community box’ despues ku muchanan baldadi òf adultonan ku mente kriminal a destruí esaki. Ta trata di e ‘community box’ na altura di misa di Coromoto, pega ku GGD.

‘Community box’ ta e lugá kaminda abitantenan ta risibí nan korespondensia, nan karta i resibunan, pues ta informashon personal i konfidensial. Den dianan tras di lomba Kòrsou a selebrá un dushi kambio di aña ku vürwèrk. Ta parse ku a usa e artefaktonan aki pa bula e ‘community box’ aki. Algu hopi serio.

Den pasado nos a konosé situashon kaminda muchanan baldadi ta rementá brivenbùs na kas di hendenan den bario. Den mayoria kaso ta muchanan/amigunan di bario mes ta hasi e mal wega ei ku otro. Den e kaso aki a rementá un kashi ku ta warda pòst di hinter un bario. EXTRA ta pendiente di CPost pa un reakshon pa mira kon ta bai aliviá e situashon pa e abitantenan, te kaminda esei ta posibel, ku awor no por hinka e kartanan den e ‘community box’.