Polis tin tur grabashon

WILLEMSTAD.-Personal di Heavy Mix a haña nan den un problema basta serio, despues ku algun chabalitu a subi nan tereno i pega vários kònteiner i tambe un ‘bobcat’ na kandela.

Doñonan a bisa ku den pasado nan a mira vários grabashon  di muchanan ku ta biba den área di Buena Vista, ku a baha e seru pega ku Heavy Mix i subi nan tereno, kore nan trùknan i hala aparatonan grandi pa traha video clip.

Pero e bia aki e kos a sali kompletamente fo’i man, kaminda e muchanan a disidí di sende e lugá na kandela. Algu sigur di lamentá kaminda tin trabou duru tumando lugá pa hiba e negoshi dilanti i algun mucha ku no tin nada di hasi, ta subi nan tereno i gewon pega e lugá na kandela hinkando e personal den problema grandi.

Polis tin e imágennan di grabashon i ta hasiendo e investigashonnan pa atendé ku e kaso aki.