Willemstad – Alumnonan di Kolegio Maria Auxiliadora, Divi Divi School, Skol Immanuel, Mgr. Niewindt College i Johan van Walbeeckschool ta partisipá den e festival di pelíkula di derechonan di mucha organisá pa UNICEF. Durante di e festival, kual ta esun di mas grandi den Karibe pa mucha, alumnonan mes ta krea i aktua den pelíkulanan riba derechonan di mucha ku nan ta haña importante. Tur e islanan den Reino  Hulandes ta partisipá den e festival: Unicef Kinder Rechten Film Festival

Apesar di e diferente kontratempu debí na e krísis di Koroná, e alumnonan a traha ku hopi amor na e proyekto. E muchanan a haña lès tokante derechonan di mucha i kada un a krea un pintura di e derecho ku mas a inspirá nan. Durante di un eksposishon kada skol a elegí nan pintura faborito kual ta forma e base di e pelíkula  ku e skol ta partisipá kuné den e festival di pelíkula. E meta ta pa muchanan siña nan derechonan di un manera interaktivo. Paso si muchanan konosé nan derechonan, nan por sali pa nan mes huntu ku adultonan.

GRAN FINAL

Banda di e parti edukativo e festival di pelíkula tin un elemento di kompetensia tambe. Durante di e estreno fin di òktober, un hurado ku ta konsisti di entre otro miembronan prominente di e mundu di pelíkula den nos komunidat, lo elegí e pelíkula ganador. Tambe e muchanan mes lo por disfrutá di nan kreashon pa promé biaha  riba pantaya grandi.

E pelíkula ganador lo representá Kòrsou den e gran final entre tur e islanan den Reino Hulandes ku lo tuma lugá dia 21 di Novèmber, un dia despues di Dia di derechonan di mucha.

E festival di pelíkula di derechonan di mucha organisá pa UNICEF, ta wòrdu sostené tambe dor di Ministerio di Asuntunan Interior i Relashonnan den Reino (BZK).