Ta spera klaridat refineria fin febrüari

WILLEMSTAD.-Un grupo di eks trahadónan di refineria Isla a bai Fòrti awe mainta, unda nan a hasi entrega di un muestra di apresio den forma di un plaka konmemorativo, na promé minister sr. Pisas. Un di e siudadanonan aki na e okashon ei a yama sr. Pisas danki pa su esfuerso ku el a hasi di manera ku e eks trahadónan por a kobra e di 4 tranche di sesantia ku ISLA/PDVSA mester a paga nan. Ainda ta falta e pago di e di 5 tranche. Nan a korda ku na luna di ougustus 2021 nan a bati na porta di sr. Pisas pa yudansa.

Pisas na su turno a gradisí pa e gesto indikando ku den bida ta kosnan chikitu, manera e gesto di apresio di e eks trahadónan, ta duna e forsa pa sigui lucha. E mandatario ta rekonose ku nan a kobra di 4 tranche pero e ta konsiente ku e preokupashon muchu mas grandi ta e echo ku e hendenan aki no tin trabou i pa esei tambe e lucha di e gabinete aktual pa logra ku e hendenan aki por tin trabou atrobe.

Promé minister a indiká ku tin gruponan ku a bai Venezuela i ku for di Venezuela a bini informashon ku PDVSA ta rekonose e debe i ta dispuesto na manda krudo. Pero prioridat ta pa haña trabou i e ta spera pa fin febrüari lo tin mas klaridat. Mas detaye den edishon di EXTRA.