Segun akusado e no kier a sex ku e viktima pa motibu ku e tin malesa króniko

WILLEMSTAD.- Despues ku e akusado Gabrielo J. a kaba di deklará den sala di korte ayera, wes a skucha su mama Yvolaine J apart. Ministerio Públiko ta pone ámbos responsabel  pa e asesinato kruel di e viktima e  hòmber S.Domitilia, ku a haña ta drif den awanan di Playa Canoa dia 18 di yüni 2023.

El a splika ku e tabatin un relashon ku e viktima i tabatin 9 luna biba kuné.

Tabata un relashon kaminda nan no tabata papia hopi, pero e sa ku e hòmber tabatin hopi sekreto.

Segun Yvolaine, e hòmber tabata gusta saya i kada bes muhénan tabata bin na su kas, pero e  tabata asina“verliefd” riba dje i a asept’é manera e tabata. Wes kier a sa di e akusado dikon e no a bai for di e hòmber e ora ei.

Wes a menshoná loke tin den e dosie, kaminda e akusado a deklará ku e no a bai, pa motibu ku e no tabatin kaminda di keda.

Pero segun e akusado esaki no ta kuadra pasobra e tin un flèt  ku su defuntu kasa a laga pe, plùs e tin tereno grandi ku el a heredá.

El a bisa ku el a keda ku e hòmber paso esaki tabata e promé hòmber ku el a stima. Na polis e muhé a deklará ku e hòmber tabata maltrat’é.

Riba dia di e asesinato, nan a bai hasi kompra mainta i ora nan a bai kas e hòmber a bai den kamber, miéntras e a bai den kushina.

Despues e hòmber a yam’e i el a bai den kamber serka dje.  E hòmber a bis’e  pa nan hasi sex, pero dor ku e hòmber tabatin e malesa di   HIV, nan a palabra ku e ta bai Hulanda promé pa sigui  un programa, paso e mester bebe remedi i na Hulanda e lo a haña un tipo di remedi pa nan hasi sex  sin protekshon kual ta pone ku e no ta pega ku e malesa.

Segun e akusado e dia ei, e viktima mester a bai Hulanda. Ora el a bis’e ku e no ke hasi sex, e viktima a bira furioso.

E viktima a bis’e ku e no por hasi sex kuné, e ta bai hasié ku su yu muhé menor. Ora ku e hòmber a lanta pa bai, el a kuminsá bringa kuné. Dado momento el a kai, e hòmber a kue un kuchú ku e tabatin pone bou di matras i bin ku esaki riba dje.

Nan a kuminsá bringa . E víktima a bolbe bis’e si e no lag’e hasi sex kuné e ta mat’e  i bai hasi sex ku e yu. Esaki a pone ku su wowonan a bira skur, el a logra kita e kuchú for di e viktima  i  hink’e mata.  Kontrali na e yu, Yvolaine a bisa ku no tabatin banki den e vèn ,el a pone e viktima drumi abou den e vèn pa nan bai hospital.  Riba e pregunta di wes na e akusado dikon e no a yama ambulans, el a bisa ku e tabatin mal eksperensia ku ambulans i p’esei e kier a bai su mes ku e vèn pa bai hiba e hòmber hospital. I tambe den su hansha e no a para ketu ku e por  yama ambulans.

El a splika ku na altura di Robbies na Abrahamz, bayendo hospital, su yu a par’e bis’e ku e viktima no ta halando rosea mas.

E ora ei el a  kai den shòk i a pensa pa bai  playa Canoa. Einan el a sinta un ratu pensa kiko pa hasi.

El a atmití di a pone “tyrap” na e víktima su garganta pa asina evitá ku e ta sigui sangra.

Ora ku nan a yega, e ta esun ku a baha e viktima fo’i e vèn ,his’e , lastr’e i bent’e den awa. El a ninga ku su yu a yud’e den esaki.

Wes a splika e akusado, ku e patólogo a duna di konosé ku e viktima tabata un hòmber ku ta pisa 95 kilo i  midi 1 meter 80, ku por hasi imposibel ku ta e akusado su so a tir’e den awa.

E akusado a  splika ku el a traha ku hòmber na Hulanda, el a kore trùk, el a traha den hospitalnan kaminda el a  hisa hende mas pisa .

Pues ta e ta esun ku a  tira e viktima den awa i tambe  su tas. Polis a pensa ku el a tira tur kos den awa, paso e dia ei e viktima  tabata bayendo Hulanda i p’esei a tira su tas di paña tambe,  pa laga kere ku e viktima a bandoná nos isla.

Despues el a kore bai ku e yu hòmber na e mirador na Airport i laga e vèn para einan. Nan a drenta den outo ku su yu i bandoná e sitio lagando e vèn patras.  Yvolaine a deklará ku el a gaña promé, paso e tabatin miedu di bai prizòn. El a kòrda riba su yu muhé menor i tabatin miedu pa nan hink’e den internat si e bai sera.

Wes a remarká ku e akusado despues di e suseso , a bai e kas bek, sigui biba normal i asta a bai entiero di e viktima.

Banda di esaki wes a puntra e akusado  ku e no a kere ku e kos aki lo no a sali na kla, mirando ku riba kámaranan di e negoshinan den área di Playa Canoa, por a mira kon e outo i vèn a kore pasa tras di otro bai Playa Canoa i despues di 20 minüt a sali bek. Tur kos a keda hasi di dia kla .

Tambe por a mira momento ku nan a bai pone e vèn para na Mirador via e imágennan di kámara.