WILLEMSTAD.- E muhé R. Walle (34) a keda akusá na 30 luna di kual 15 kondishonal pa mas ku 11 kilo di koka na pasta den su maleta. Ayera Walle a presentá den sala di korte pa responsabilisá su mes pa su akto.  Segun e akusashon dia 25 di desèmber 2021, e kier a transportá e kantidat di droga riba un buelo di Air Belguim.

Duana ku a kontrolá e maleta, a tuma nota ku e tabata hopi pisá. Despues di un investigashon, a haña e  paketenan lorá den papelnan di kushina den e bòm di e ekipahe.

Walle a bisa ku e tabata sa ku den su maleta tabatin droga, pero e no tabata sa e kantidat. Segun e akusado e lo a haña 8 mil euro pa e transportashon.

El a bisa e motibu ku el a tuma e desishon pa transportá droga tabata, paso e tabatin debe di 10 mil florin na Banco di Caribe i  40 mil florin na Fundashon Kas Popular. Dia ku e tabata traha na kasino, nan a bin ku un sistema ku por fia sèn pa traha kas. El a fia sèn pa por paga 500 florin den término. Pero despues di a pèrdè trabou, e no por a sigui paga mas i e debe nan a sigui oumentá.  Ambos empresa, den lastu tempu a kuminsá manda atvertensia pa e bin paga.

El a bisa ku e no a pensa hopi ni e konsekuensianan, pasó e úniko kos ku e tabata ke ta sali fo’i dje problema di debe. E akusado a konta ku un dia e tabata sintá pafó na trabou, ora ku un hòmber a yega i kuminsá kombersá kuné i ofresé e oferta.

El a bai kas, pens’é i despues a disidí di hasi trabou. El a splika ku e dia ku e mester a biaha e persona a trese e maleta pe drechá kaba.

Fiskal a haña e akusashon por keda probá a base di e deklarashon di e akusado mes i tambe e droga konfiská. Fiskal a  bisa ku tur hende ta responsabel pa su aktonan i desishonnan.

Fiskal a tene kuenta ku e akusado ta un “first offender” i tambe su situashon personal. Banda di esaki, fiskal ta tene kuenta ku e  droga tabata na pasta i ta kita 20% for di e kantidat. Mirando tur esakinan fiskal ta yega na e demanda di 30 luna di prizòn.

Wes den su veredikto a bisa e akusado ku el a wòrdu usá pa un kantidat di sèn pero e doñonan di e droga lo a gana muchu mas plaka ku e transportashon. Segun wes e tipo di personanan aki ta buska hendenan vulnerabel, ku tin vários debe. Pero wes ta tene kuenta ku su situashon personal ku e tin un yu chikí i ke bai kas pa kuida su yu. Den mesun rosea wes a bisa ku e ke manda un señal pa komunidat ku tipo di echonan aki ta kastigabel ku kastigu di prizòn severo.

Wes a bisa ku e ke duna e akusado un chèns pero lo laga un kastigu haltu keda kologá riba su kabes. Wes ta bai di kuerdo ku e demanda di fiskal di 30 luna di kual 15 luna kondishonal.