WILLEMSTAD.- E akusado prinsipal den kaso di trafikashon di hende “Freedom” Yahaira “Lady” Nunez Toro, a keda demandá ayera un bia mas na 5 aña di prizòn den Hof.
Den korte di promé instansia tambe “Lady “ a keda demandá na 5 aña, pero hues a yega na un kondena di 30 luna. Su detenshon a keda posponé pendiente tratamentu di e kaso.
“Lady” Nunez Toro tabata manehá e bar di “trago meisjes” riba Rooseveltweg den e periodo di 2017 pa 2018.
Pa ku e kaso aki Ministerio Públiko ta akusá 4 akusado ku a keda kondená den korte di promé instansia.
Ta trata di J. Janzen i R. Janzen ku a keda kondená na 240 ora di trabou, despues ku fiskal a pidi 24 luna pa nan di kual 6 kondishonal i yu muhé di Lady, K. Nunez ku a keda demandá na 4 aña di kual 1 kondishonal pero a keda apsolvé for di tur kulpa.
Hues a duna di konosé ku “Lady” tabata esun responsabel pa e aktonan, mirando ku tur e damanan a deklará kontra dje.
“Lady” ta nasé na Venezuela i ta keda konsiderá komo un persona basta kruel pa e víktimanan.
Huntu ku “Lady” su pareha i su yu tambe ta wòrdu akusá komo komplasé den e kaso aki. Tur a presentá ayera den sala di korte ayera.
Nan a keda akusá pa trafikashon i eksplotashon di hende, mal uso di damanan pa hasi sex ku otronan kontra nan boluntat, laga e damanan traha miéntras nan tabata sa ku nan ta ilegal, obligá nan paga nan Internet, kuminda, kamber, koriente, awa sin ku nan tabata wòrdu paga i obligá pa para riba sapatu haltu mas di 9 ora.
Segun Ministerio Públiko hopi kos tabata tuma lugá den e klup nokturno na Rooseveltweg ku no tabata kuadra ku lei. Fiskal a bisa ku ta aktonan di sklabitut moderno tabata tuma lugá.
E víktimanan ku ta keda yamá muhénan di trago( trago meisjes), a wòrdu tres’é Kòrsou bou di promesanan falsu.
Nan tabata wòrdu reklutá na Venezuela pa bai Kòrsou i traha. Fo’i Venezuela nan tabatin kontakto ku Yahaira.
J. Janzen tabata buska nan i hiba nan na kas òf e bar ariba, miéntras R. Janzen a keda konsiderá komo kómplise mirando ku el a habri e negoshi riba su nòmber.
Nan no a wòrdu atvertí ku nan lo no haña niun sèn den nan man, te ora nan kaba di paga nan debe i tambe ku tin butnan mará na sierto aktonan ku nan kometé.
Yahaira a ninga tur e akusashonnan.
R. Janzen a bisa ku e kier a yuda e señora habri negoshi pe e tin un ganashi, miéntras i J. Janzen a bisa ku e tabata bai einan pa pasa ratunan agradabel i no a pensa ku tabata trata di trafikashon humano.
Abogado general a haña tur e akusadonan kulpabel pa trafikashon humano. Pa Yahaira el a hasi un demanda di 5 aña pa R., i J. Janzen tur dos na 24 luna di kual 6 kondishonal i 4 aña di kual 1 kondishonal pa e yu muhé K. Nunez.
Yahaira awa na wowo a bisa den su último palabra ku e ke pidi e huesnan pordon, el a pidi Dios pordon i si e damanan tabata tei lo el a pidi nan tambe pordon si el a hasi nan daño.
Korte lo dikta sentensia dia 29 di òktober binidero.