WILLEMSTAD.- Outomobilistanan moviendo den área di Berg Altena a haña sustu di nan bida despues ku un muhé pa motibunan deskonosí a baha i grita “Mi ta tira tur hende mata”.

Tabata nèt na e lusnan di tráfiko na Ser’i Pietermaai/Berg Altena ku e muhé lo mester a baha for di su vehíkulo, bula dilanti di un otro vehíkulo i tabata grita “Mi ta tira tur hende mata” miéntras ku e tabatin un paña ta tapa su man.

Esaki a pone ku un persona a sigui e vehíkulo aki i a yama sentral di polis i pone nan na altura.

Polisnan di Tim di Mantenshon i Orden Públiko a yega mesora pa atendé ku e persona i tambe a kontrolá su vehíkulo.

Den e vehíkulo a bin topa ku dos arma blanku ku a keda konfiská.

Tambe a duna e persona un prosèsverbal i a atendé kuné severamente pa su komportashon ku no tabata unu normal i sigur no den tráfiko.