WILLEMSTAD. - Resientemente durante kasonan di mula korte di promé instansia, a trata kaso verstèk di un akusado femenino di 33 aña di edat.
E ta keda akusá di a trata na eksportá un kantidat di 507 gram di mariwana pa Boneiru.
Mirando ku e akusado a risibí su dagfar, pues tabata na altura ku su kaso mester a keda tratá, pero e no a presentá pa responsabilisá su mes, korte a bai di akuerdo pa trata e kaso tòg integralmente.
Fiskal a duna di konosé ku ora e akusado a yega Hato, outoridatnan konserní a tuma nota ku e tabata kana un manera basta straño.
Esei ta loke a hala nan atenshon i p’esei nan a disidí di hasi un kontròl profundo riba su persona.
E akusado tabatin 3 pakete di mariwana di plak na su bèlnan i tambe na su barika.
Na polis el a deklará ku e tabata den gran nesesidat di plaka i p’esei el a kumpra e droga serka un venezolano ku e konosé pa kara, pa e mes hiba e droga pa e bai traha sèn na Boneiru.
Fiskal a haña e akusashon probá i a konsiderá e akusado komo un “ first offender” mirando ku fo’i aña 2010 el a wòrdu sentensiá i tambe na 2012 pa mesun lei di opio.
Mirando esakinan fiskal a pidi un kastigu di 6 luna di kual 3 kondishonal mas 3 aña di prueba.
Hues den su desishon a bai kompletamente di akuerdo ku e demanda di fiskal, mirando ku e akusado no a presentá den sala pa responsabilisá su mes pa su akto. E no tabatin abogado tampoko.