Mula gará ku 2 pakete di mariwana den su djòki

WILLEMSTAD.-  Ayera isla di Boneiru tabata liña kòrá durante kasonan di mula.  E akusado I. Bentura (42) tambe mester a presentá dilanti hues, akusá di a trata na eksportá droga pa Boneiru.

Bentura tabata e di 4 akusado ayera ku mester a presentá den korte, akusá di a trata na eksportá droga  pa e isla di flamingo. Kada kaso tabata diferente.

E akusado no a presentá pa responsabilisá su mes pa  su akto.

Segun e akusashon di Ministerio Públiko, dia 21 di yüli el a keda gará ku 355 gram di mariwana riba dje rumbo pa Boneiru.

Segun e prosèsverbal di e miembronan atento na duana, na momento ku e akusado a yega Hato, e tabata aktuando basta nèrvioso.

Esei a pone ku nan a par’e promé ku el a subi e avion di Divi pa un kontrol mas profundo.

E tabata tin un tas di lomba kual no a haña nada den dje.

Ora ku a kontrolá na su karson, e miembro di duana a sinti algu straño de su djòki.  Mes ora a pidié pa kita su paña pa wak kiko te kos ku e tin hinka den su karson.

Na momento ku e akusado a kita su karson, a resultá ku e tabatin 2 pakete di mariwana hinka den su djòki ku a suma e total di 355 gram. El a atmití su kulpa mes ora.

Fiskal a indiká ku na aña 2006 tambe el a keda kondená pa lei di opio.

Mirando tur esakinan fiskal a yega na e demanda di 9 luna kompletamente inkondishonal mas 3 aña di prueba.

Hues den su desishon a bai kompletamente di akuerdo ku e demanda di fiskal.