WILLEMSTAD.- Durante tratamentu di e kasonan di mula resientemente, e akusado P.W. (30) a lamentá di a pèrdè su trabou pa trafiká ku droga.

E akusado ta keda akusá di a trata na eksportá 982 gram di koka pa eksterior.

Segun prosèsverbal, e personal di duana atento a deskubrí e droga den maleta ku e akusado tabata biaha kuné.

El a deklará  na polis ku un konosí di dje maskulino a pidié pa hasié un fabor i hiba algu pe Hulanda.

Segun e akusado mirando e konfiansa ku e tabatin ku e persona, e no a pensa nada robes.

El a splika ku el  fia e maleta serka e konosí a base di konfiansa.

Mas aleu e akusado a bisa ku el a kontrolá e maleta ariba ariba i no a nota nada straño.

Ta ora el a keda deten’é na Hato pa transportashon di koka, el a haña sa ku tabatin droga skondí den su maleta.

Fiskal ta haña e akusashon probá i ta bisa ku e akusado ta responsabel pa su maleta.

Mirando esaki fiskal ta hasi un demanda di 12 luna  di kual 6 kondishonal.

E akusado a bisa ku e ta lamentá loke el a hasi i mas ainda ku el a pèrdè su trabou figo ku e tabatin.

Hues na final a tene kuenta ku e akusado a kai den man di hustisia pa promé bia i a desviá for di e demanda i a konden’é na 9 luna di kual 3 kondishonal.