WILLEMSTAD.- Durante kasonan di mula, e akusado R.M. a keda kondená na 18 luna den korte di promé instansia pa trafikashon di droga.

Den kasonan di mula hopi ta esnan  ku ta presentá den sala di korte pa responsabilisá nan mes pa nan akto, pero hopi ta preferá pa no ta presente pa tratamentu di nan kaso.

Den e kaso aki, korte a trata nan kaso den nan ousensia i duna kastigu. Wes a yega di bisa vários bia ku si e akusado ta presente i splika di su banda, esaki por tin bentaha pe.

Pasamentu di droga ketu bai ta un fenómeno den nos komunidat.

Diariamente sospechosonan ta keda gará na Hato pa pasamentu di droga den maleta, den partinan íntimo òf di otro forma. Nan ta riska nan libertat pa sèn ku hopi bia no ta di gran kantidat.

E bia aki Ministerio Públiko ta akusá e akusado ariba menshoná di a trata na eksportá un kantidat di 587 gram di koka pa Hulanda den su tas di lomba.

E akusado no a presentá  den sala di korte durante  tratamentu di su kaso, pero korte a bai di akuerdo pa trata su kaso tòg, mirando ku el a haña su dagfar den su man kaba.

Durante un kontròl, e personal di duana a haña e droga den tas di lomba di e akusado. E droga tabata yená den sakunan di plèstik den forma di pasta, den bòm falsu di e tas. Na polis e akusado a keda ketu den promé instante, pa despues bisa ku e no tabata sa ku tin droga den e tas.  Pero despues a disidí di hasi uso di su  derechi keda ketu.

Dado momento el a deklará,  ku e mes a kumpra su ticket pa e por bai keiru Hulanda pa bai wak algun famia.

Fiskal a splika di no tin masha informashon di e akusado, mirando ku kasi e no kier a papia nada. Fiskal ta haña e akusashon probá i a demandá e akusado na 18 luna di kual 9 kondishonal, ku un periodo di  prueba di 3 aña.

Wes den su desishon, no a mira motibu pa desviá for di e demanda i a bai kompletamente di akuerdo ku e demanda di fiskal.