WILLEMSTAD.- Studiantenan ku resientemente a ali pa Ulanda pa sigui nan estudio avansá, a keda risibí pa diferente persona, mandatario, studiante di vários aña i organisashon na Ulanda. E studiantenan di Kòrsou, Aruba, Boneiru i St.Maarten a haña diferente tep i konseho pa nan estadia na Ulanda i kon pa logra un estudio eksitoso.

Entre e personanan presente tabatin minister plenipotensiario di Kòrsou  sr Manuel, tambe di Aruba e minister plenipotensiario Thijsen, sra Tanya Fraai di WeConnect, Dirk de Jager vise alkalde di Amsterdam i tambe studiante di 3 aña Savino Every.

E tin 20 aña i 3 aña pasá el a bai studia Ulanda. Savino a pidi e hóbennan pa nan kuida nan kurpa, konstruí relashonnan di balor i na di tres lugá i sigur importante ta priorisá bo salú mental.

Savino a konta e hóbennan studiante ku el a yega Ulanda el a dediká su mes kompleto na su estudio i bida sosial. El a logra hopi den su estudio i alabes e tabata traha den un supermerkado. Pero esei a sòru pa den su promé aña na Ulanda el a ‘Burnout’. E ta kòrda kon e tabata drumi lat pa e sakrifiká pa haña puntuashonnan haltu den su estudio. E no tabata kome ni bebe sufisiente awa pasobra e  tabata asina opseshoná pa ta produktivo. El a splika ku e no por a sinta ketu pasobra e tabata ke ta mas i mas produktivo. El a bira malu. I e ke kier a sa si ta esaki ta logra éksito. Sakrifiká pa logra bo soño. I p’esei el a pidi e hóbennan pa pone atenshon na nan salú mental, kome i bebe sufisiente awa i kòrda sosegá pasobra bo meresé.

Tambe el a toka e punto di konstruí relashon signifikante. E ta kòrda ku el a move di un parti di Amsterdam pa otro i e distansia a  stroba pa tin un relashon i difísil pa e haña su mes. Tambe move di un parti pa otro a lag’e kòrda riba su bida na Kòrsou i mayoria di su amistatnan a bira solamente un yamada di telefòn òf app i esei no tabata sufisiente pe. El a perseverá  a disidí di bai konsentrá solamente na skol i trabou dia aden dia afó. El a haña diferente skor haltu i a bira manager kaminda e tabata traha. E mester a dil ku tur kos su so, i e ta puntra su mes si ta esaki ta éksito. Ta bo so.

El a konsehá e hóbennan pa buska hende ku nan por konfia. I aki no ta kantidat ta konta pero hende di kalidat.

Priorisá bo salú mental. E  tabata pasando den demasiado kos i tabata pone demasiado preshon riba su mes pa logra i tabata pone su famia i su isla su espektativa, soñonan riba esnan di dje i no a laga espasio pa e mes. Tur hende tabata apoy’é kon bon e tabata bayendo, loke sigur no a kontribuí na su salú mental. El a yega na un punto ku e mester a buska yudansa profeshonal i esaki tabata un di e desishonnan di mas duru ku Savino mester a hasi den su bida ya ku salú mental ta un tabú riba nos isla i bo ta keda stigmatisá ku esaki. Savino tabatin bèrgwensa di pidi kualke tipo di yudansa ku por tabata pasobra hende tabata wak solamente e éksito di su historia. Dado momentu el a puntra su mes si ta esaki tabata éksito. Esaki no ta éksito sigur ku no. El a buska yudansa i mester a siña kita tur e kustumber na malu. P’esei e ta pidi e hóbennan pa priorisá nan salú mental i tuma tempu pa nan mes. El a sigui kuida su kurpa, konstruí relashonnan signifikante i un bon salú mental. Un studiante eksitoso ta esun ku ta gosa di su estudio paden i pafó.

Fotonan

Riba e kombinashon di fotonan por mira e hóbennan studiante na Amsterdam. Tambe momentu ku tantu ministernan plenipotensiario di Korsou komo di Aruba a dirigí nan mes na e hóbennan, tambe sra Tanya Fraai i e studiante di 3 aña Savino Every.